15 ਲੱਖ ਰੁਪਏ ਨਕਦੀ ਅਤੇ ਸੋਨੇ ਦੇ ਗਹਿਣੇ ਚੋਰੀ ਹੋਣ ਦੇ ਮਾਮਲੇ ਵਿਚ ਪੁਲਸ ਨੇ ਕੁਝ ਹੀ ਘੰਟਿਆਂ ਵਿਚ ਮਾਮਲਾ ਸੁਲਝਾਉਂਦੇ ਹੋਏ ਹੈਰਾਨੀਜਨਕ ਖੁਲਾਸਾ ਕੀਤਾ
Live Punjabi Tv / Khanna
ਪੁਲਸ ਨੇ ਕੁਝ ਹੀ ਘੰਟਿਆਂ ਵਿਚ ਮਾਮਲਾ ਸੁਲਝਾਉਂਦੇ ਹੋਏ ਹੈਰਾਨੀਜਨਕ ਖੁਲਾਸਾ ਕੀਤਾ।
ਖੰਨਾ ਪੁਲਿਸ ਜ਼ਿਲ੍ਹਾ ਅਧੀਨ ਥਾਣਾ ਮਾਛੀਵਾੜਾ ਦੇ ਇੱਕ ਵਪਾਰੀ ਘਰੋਂ ਭੇਤਭਰੇ ਢੰਗ ਨਾਲ 15 ਲੱਖ ਰੁਪਏ ਨਕਦੀ ਅਤੇ ਸੋਨੇ ਦੇ ਗਹਿਣੇ ਚੋਰੀ ਹੋਣ ਦੇ ਮਾਮਲੇ ਵਿਚ ਪੁਲਸ ਨੇ ਕੁਝ ਹੀ ਘੰਟਿਆਂ ਵਿਚ ਮਾਮਲਾ ਸੁਲਝਾਉਂਦੇ ਹੋਏ ਹੈਰਾਨੀਜਨਕ ਖੁਲਾਸਾ ਕੀਤਾ।
ਵਪਾਰੀ ਵਲੋਂ ਉਸਦੇ ਪਰਿਵਾਰ ਵਲੋਂ ਸੀਸੀਟੀਵੀ ਕੈਮਰੇ ਦੀ ਫੁੱਟੇਜ ਦੇ ਅਧਾਰ ’ਤੇ ਸ਼ਹਿਰ ਦੇ ਇੱਕ ਵਿਅਕਤੀ ਉੱਪਰ ਸ਼ੱਕ ਕੀਤਾ ਜਾ ਰਿਹਾ ਸੀ ਕਿ ਉਸਨੇ ਚੋਰੀ ਦੀ ਘਟਨਾ ਨੂੰ ਅੰਜ਼ਾਮ ਦਿੱਤਾ ਹੈ। ਇਸ ਸਬੰਧੀ ਅੱਜ ਡੀ.ਐੱਸ.ਪੀ. ਸਮਰਾਲਾ ਨੇ ਕਾਨਫਰੰਸ ਕਰਕੇ ਦੱਸਿਆ ਕਿ ਵਪਾਰੀ ਅਭੈ ਕੁਮਾਰ ਦੀ ਸ਼ਿਕਾਇਤ ’ਤੇ ਮਾਛੀਵਾੜਾ ਥਾਣਾ ਦੇ ਮੁਖੀ ਚਰਨਜੀਤ ਸਿੰਘ ਵਲੋਂ ਮਾਮਲੇ ਨੂੰ ਗੰਭੀਰਤਾ ਨਾਲ ਲੈਂਦੇ ਹੋਏ ਵਪਾਰੀ ਦੀ ਸ਼ਿਕਾਇਤ ਦੇ ਅਧਾਰ ’ਤੇ ਅੱਜ ਚੋਰੀ ਦੀ ਸ਼ੰਕਾ ਵਾਲੇ ਵਿਅਕਤੀ ਅਤੇ ਆਸਪਾਸ ਗੁਆਂਢੀਆਂ ਨੂੰ ਪੁੱਛਗਿੱਛ ਲਈ ਥਾਣੇ ਬੁਲਾਇਆ ਗਿਆ। ਮਾਛੀਵਾੜਾ ਥਾਣਾ ਦੇ ਮੁਖੀ ਚਰਨਜੀਤ ਸਿੰਘ ਨੇ ਜਦੋਂ ਚੋਰੀ ਘਟਨਾ ਦੀਆਂ ਕੜੀਆਂ ਨੂੰ ਜੋੜਿਆ ਤਾਂ ਮਾਮਲਾ ਕੁਝ ਹੋਰ ਹੀ ਨਿਕਲਿਆ ਜਿੱਥੇ ਘਰ ਦੇ ਭੇਤੀ ਨਾਬਾਲਗ ਪੁੱਤਰ ਨੇ ਹੀ ਆਪਣੇ ਬਾਪ ਦੀ ਲੰਕਾ ਨੂੰ ਢਹਿ-ਢੇਰੀ ਕੀਤਾ ਹੋਇਆ ਸੀ।
ਪੁਲਸ ਵਲੋਂ ਮੁੱਢਲੀ ਜਾਂਚ ਦੌਰਾਨ ਇਹ ਸਾਹਮਣੇ ਆਇਆ ਕਿ ਘਰ ਦੇ ਨਾਬਾਲਗ ਲੜਕੇ ਨੇ ਹੀ ਆਪਣੇ ਪਿਤਾ ਦੀ ਗੁਪਤ ਤਿਜੋਰੀ ਜੋ ਕਿ ਪੂਜਾ ਸਥਾਨ ਵਾਲੀ ਥਾਂ ’ਤੇ ਇੱਕ ਕੰਧ ਵਿਚ ਬਣਾਈ ਹੋਈ ਸੀ, ਉਸ ’ਚੋਂ ਪੈਸੇ ਕੱਢੇ ਅਤੇ ਆਪਣੀ ਐਸ਼ਪ੍ਰਸਤੀ ਲਈ ਖਰੀਦੇ ਕੀਮਤੀ ਸਮਾਨ ਵਿਚ ਉਡਾ ਦਿੱਤੇ। 13 ਸਾਲ ਦਾ ਅੱਠਵੀਂ ਜਮਾਤ ਵਿਚ ਪੜ੍ਹਦਾ ਬੱਚਾ ਐਨਾ ਵੱਡਾ ਕਾਰਨਾਮਾ ਕਰ ਜਾਵੇਗਾ ਕਿਸੇ ਨੇ ਸੋਚਿਆ ਵੀ ਨਹੀਂ ਸੀ। ਡੀਐੱਸਪੀ ਨੇ ਦੱਸਿਆ ਕਿ ਪੁਲਸ ਨੇ ਝੂਠੀ ਸ਼ਿਕਾਇਤ ਦਰਜ ਕਰਵਾਉਣ ’ਤੇ ਵਪਾਰੀ ਅਭੈ ਕੁਮਾਰ ਅਤੇ ਘਰ ’ਚੋਂ ਹੀ ਚੋਰੀ ਕਰਨ ਵਾਲੇ ਨਾਬਾਲਗ ਲੜਕੇ ’ਤੇ ਪਰਚਾ ਦਰਜ ਕੀਤਾ ਹੈ।
ਨਾਬਾਲਗ ਲੜਕੇ ਨੇ ਹੀ ਪਿਤਾ ਨੂੰ ਦੱਸਿਆ ਕਿ ਉਸ ਨੂੰ ਕੁਝ ਸੁੰਘਾ ਕੇ ਚੋਰ ਪੈਸੇ ਲੈ ਗਏ . ਵਪਾਰੀ ਵਲੋਂ ਜਦੋਂ ਚੋਰੀ ਦੀ ਘਟਨਾ ਹੋਈ ਤਾਂ ਉਸਨੇ ਆਪਣੇ ਨਾਬਾਲਗ ਪੁੱਤਰ ਤੋਂ ਪੈਸਿਆਂ ਦੀ ਪੁੱਛਗਿੱਛ ਕੀਤੀ ਸੀ ਜਿਸ ਨੇ ਆਪਣੇ ਪਿਤਾ ਨੂੰ ਹੀ ਗੁੰਮਰਾਹ ਕੀਤਾ ਕਿ ਘਰ ਵਿਚ 2 ਵਿਅਕਤੀ ਦਾਖਲ ਹੋਏ ਜਿਨ੍ਹਾਂ ਨੇ ਉਸ ਨੂੰ ਕੁਝ ਨਸ਼ੀਲੀ ਚੀਜ਼ ਸੁੰਘਾ ਕੇ ਬੇਹੋਸ਼ ਕਰ ਦਿੱਤਾ। ਨਾਬਾਲਗ ਲੜਕੇ ਨੇ ਦੱਸਿਆ ਸੀ ਕਿ ਚੋਰਾਂ ਕੋਲ ਇੱਕ ਤਿੱਖੀ ਚੀਜ ਸੀ ਅਤੇ ਉਹ ਤਿਜੋਰੀ ’ਚੋਂ ਪੈਸੇ ਚੋਰੀ ਕਰਕੇ ਲੈ ਗਏ। ਲੜਕੇ ਨੇ ਆਪਣੇ ਮਾਪਿਆਂ ਨੂੰ ਇਹ ਵੀ ਦੱਸਿਆ ਕਿ ਚੋਰਾਂ ’ਚੋਂ ਇੱਕ ਵਿਅਕਤੀ ਨੂੰ ਪਹਿਚਾਣਦਾ ਹੈੈ ਜੋ ਕਿ ਸਭ ਕੁਝ ਝੂਠ ਨਿਕਲਿਆ।
ਪਿਤਾ ਵਲੋਂ 15 ਲੱਖ ਰੁਪਏ ਦੀ ਵੱਡੀ ਚੋਰੀ ਅਤੇ ਪੁੱਤਰ ਵਲੋਂ ਦਿੱਤੀ ਜਾਣਕਾਰੀ ਤੇ ਸੀਸੀਟੀਵੀ ਫੁੱਟੇਜ਼ ਦੇ ਅਧਾਰ ’ਤੇ ਪੁਲਸ ਨੂੰ ਸ਼ਿਕਾਇਤ ਦਰਜ ਕਰਵਾ ਦਿੱਤੀ ਪਰ ਮਾਮਲਾ ਇਹ ਨਿਕਲਿਆ ਕਿ ਉਸਦਾ ਪੁੱਤਰ ਹੀ ਘਰ ’ਚ ਪੈਸੇ ਚੋਰੀ ਕਰ ਰਿਹਾ ਸੀ।
ਮਾਪਿਆਂ ਨੂੰ ਕਿਹਾ ਕਿ ਮੇਰਾ ਇੱਕ ਅਮੀਰ ਦੋਸਤ ਮੈਨੂੰ ਮੋਟਰਸਾਈਕਲ, ਮੋਬਾਇਲ ਤੇ ਹੋਰ ਮਹਿੰਗੇ ਗਿਫ਼ਟ ਦੇ ਰਿਹਾ
ਵਪਾਰੀ ਦਾ ਨਾਬਾਲਗ ਬੱਚਾ ਬਹੁਤ ਤੇਜ਼ ਤਰਾਰ ਨਿਕਲਿਆ ਜੋ ਕਿ ਆਪਣੇ ਘਰ ’ਚੋਂ ਹੀ ਪੈਸੇ ਚੋਰੀ ਕਰਕੇ ਆਪਣੇ ਲਈ ਐਸ਼ਪ੍ਰਸਤੀ ਵਾਲਾ ਸਮੀਨ ਖਰੀਦਣ ਲੱਗ ਪਿਆ। ਪਹਿਲਾਂ ਉਸਨੇ 75 ਹਜ਼ਾਰ ਰੁਪਏ ਦੀ ਵੀਡੀਓ ਗੇਮ ਲਈ, ਫਿਰ ਸੁਨਿਆਰੇ ਤੋਂ ਕੁਝ ਸਮਾਨ ਖਰੀਦਿਆ, ਇੱਥੋਂ ਤੱਕ ਕਿ 2-3 ਮਹਿੰਗੇ ਮੋਬਾਇਲ ਖਰੀਦੇ ਅਤੇ ਕੁਝ ਦਿਨ ਪਹਿਲਾਂ ਉਸਨੇ ਪਿਤਾ ਤੋਂ 1.20 ਲੱਖ ਰੁਪਏ ਲੈ ਕੇ ਅਤੇ ਆਪਣੇ ਕੋਲੋਂ 1.50 ਲੱਖ ਪਾ ਕੇ ਨਵਾਂ ਬੁਲਿਟ ਮੋਟਰਸਾਈਕਲ ਖਰੀਦਿਆ। ਉਸਨੇ ਮਾਪਿਆਂ ਨੂੰ ਕਿਹਾ ਕਿ ਉਸਦਾ ਇੱਕ ਦੋਸਤ ਹੈ ਜੋ ਬਹੁਤ ਅਮੀਰ ਹੈ ਅਤੇ ਹੁਣ ਵਿਦੇਸ਼ ਜਾ ਰਿਹਾ ਹੈ ਜਿਸ ਲਈ ਉਸਨੂੰ ਮਹਿੰਗੇ ਗਿਫ਼ਟ ਦਿਵਾ ਰਿਹਾ ਹੈ।
ਮਾਪੇ ਆਪਣੇ ਨਾਬਾਲਗ ਪੁੱਤਰ ਦੀ ਗੱਲ ’ਤੇ ਯਕੀਨ ਕਰਦੇ ਰਹੇ ਪਰ ਜਦੋਂ ਅੰਤ ਵਿਚ ਭੇਤ ਖੁੱਲ੍ਹਿਆ ਤਾਂ ਉਨ੍ਹਾਂ ਦੇ ਪੈਰਾਂ ਹੇਠੋਂ ਜਮੀਨ ਖਿਸਕ ਗਈ ਕਿ ਘਰ ’ਚੋਂ ਪੈਸੇ ਚੋਰੀ ਕਰ ਛੋਟੀ ਉਮਰ ਵਿਚ ਐਸ਼ਪ੍ਰਸਤੀ ਵਾਲੇ ਸਮਾਨ ਖਰੀਦ ਰਿਹਾ ਹੈ।
Khanna police arrested accused
