ਚੰਡੀਗੜ੍ਹ ’ਚ ਘਰ ਦੇ ਬਾਹਰੋਂ 2 ਬੱਚੇ ਲਾਪਤਾ; CCTV Footage ਆਈ ਸਾਹਮਣੇ
Chandigarh
ਚੰਡੀਗੜ੍ਹ ’ਚ ਘਰ ਦੇ ਬਾਹਰੋਂ 2 ਬੱਚੇ ਲਾਪਤਾ; CCTV Footage ਆਈ ਸਾਹਮਣੇ
ਚੰਡੀਗੜ੍ਹ, 24 ਦਸੰਬਰ: ਚੰਡੀਗੜ੍ਹ ਦੇ ਰਾਏਪੁਰ ਖੁਰਦ ਇਲਾਕੇ ਵਿੱਚ ਘਰ ਦੇ ਬਾਹਰ ਖੇਡ ਰਹੇ ਦੋ ਨਾਬਾਲਿਗ ਬੱਚੇ ਅਚਾਨਕ ਗਾਇਬ ਹੋ ਗਏ ਹਨ। ਘਟਨਾ ਨੂੰ ਇੱਕ ਦਿਨ ਤੋਂ ਵੱਧ ਸਮਾਂ ਬੀਤ ਚੁੱਕਾ ਹੈ, ਪਰ ਹਾਲੇ ਤੱਕ ਬੱਚਿਆਂ ਬਾਰੇ ਕੋਈ ਢੁਕਵੀਂ ਜਾਣਕਾਰੀ ਨਹੀਂ ਮਿਲੀ। ਪਰਿਵਾਰ ਨੂੰ ਨਾ ਤਾਂ ਕੋਈ ਫਿਰੌਤੀ ਸੰਬੰਧੀ ਕਾਲ ਆਈ ਹੈ ਅਤੇ ਨਾ ਹੀ ਹੋਰ ਕੋਈ ਇਸ਼ਾਰਾ ਮਿਲਿਆ ਹੈ।
ਮਾਮਲੇ ਦੀ ਗੰਭੀਰਤਾ ਨੂੰ ਦੇਖਦਿਆਂ ਪੁਲਿਸ ਵੱਲੋਂ ਤੁਰੰਤ ਤਿੰਨ ਵਿਸ਼ੇਸ਼ ਟੀਮਾਂ ਬਣਾਈਆਂ ਗਈਆਂ ਹਨ। ਇਸ ਤੋਂ ਇਲਾਵਾ ਪੰਜਾਬ ਅਤੇ ਨੇੜਲੇ ਜ਼ਿਲ੍ਹਿਆਂ ਦੀ ਪੁਲਿਸ ਨਾਲ ਵੀ ਜਾਣਕਾਰੀ ਸਾਂਝੀ ਕੀਤੀ ਗਈ ਹੈ, ਤਾਂ ਜੋ ਬੱਚਿਆਂ ਦੀ ਭਾਲ ਤੇਜ਼ੀ ਨਾਲ ਕੀਤੀ ਜਾ ਸਕੇ।
CCTV ਫੁਟੇਜ ਆਈ ਸਾਹਮਣੇ
ਜਾਂਚ ਦੌਰਾਨ ਪੁਲਿਸ ਨੂੰ ਇੱਕ ਸੀਸੀਟੀਵੀ ਫੁਟੇਜ ਮਿਲੀ ਹੈ, ਜਿਸਨੂੰ ਬੱਚਿਆਂ ਦੀ ਆਖਰੀ ਮੌਜੂਦਗੀ ਮੰਨਿਆ ਜਾ ਰਿਹਾ ਹੈ। ਫੁਟੇਜ ਵਿੱਚ ਦੋਵੇਂ ਬੱਚੇ ਇਕੱਠੇ ਤੁਰਦੇ ਹੋਏ ਨਜ਼ਰ ਆ ਰਹੇ ਹਨ। ਪੁਲਿਸ ਮੁਤਾਬਕ ਲਾਪਤਾ ਬੱਚਿਆਂ ਦੀ ਪਛਾਣ 8 ਸਾਲਾ ਈਸ਼ਾਂਤ ਅਤੇ 12 ਸਾਲਾ ਆਯੁਸ਼ ਵਜੋਂ ਹੋਈ ਹੈ। ਦੋਵੇਂ ਮਜ਼ਦੂਰ ਪਰਿਵਾਰ ਨਾਲ ਸੰਬੰਧਿਤ ਹਨ। ਇੱਕ ਬੱਚਾ ਤੀਜੀ ਜਮਾਤ ਵਿੱਚ ਪੜ੍ਹਦਾ ਹੈ, ਜਦਕਿ ਦੂਜਾ ਸਕੂਲ ਨਹੀਂ ਜਾਂਦਾ।
ਰਾਤ ਭਰ ਚੱਲੀ ਤਲਾਸ਼ ਮੁਹਿੰਮ
ਮੌਲੀ ਜੱਗਰਾਂ ਥਾਣੇ ਦੇ ਐਸਐਚਓ ਹਰੀ ਓਮ ਸ਼ਰਮਾ ਨੇ ਦੱਸਿਆ ਕਿ ਸੂਚਨਾ ਮਿਲਦੇ ਹੀ ਸਰਚ ਆਪ੍ਰੇਸ਼ਨ ਸ਼ੁਰੂ ਕਰ ਦਿੱਤਾ ਗਿਆ ਸੀ। ਪੁਲਿਸ ਟੀਮਾਂ ਨੇ ਰਾਤ ਭਰ ਬੱਸ ਸਟੈਂਡ, ਰੇਲਵੇ ਸਟੇਸ਼ਨ, ਏਅਰਪੋਰਟ ਸਮੇਤ ਹੋਰ ਜਨਤਕ ਥਾਵਾਂ ਦੀ ਜਾਂਚ ਕੀਤੀ। ਇਸ ਤੋਂ ਇਲਾਵਾ ਹਸਪਤਾਲਾਂ, ਧਾਰਮਿਕ ਸਥਾਨਾਂ, ਖਾਲੀ ਮਕਾਨਾਂ ਅਤੇ ਪੁਰਾਣੀਆਂ ਇਮਾਰਤਾਂ ਨੂੰ ਵੀ ਖੰਗਾਲਿਆ ਗਿਆ। ਇੱਕ ਟੀਮ ਅਜੇ ਵੀ ਮੌਕੇ ’ਤੇ ਸਰਗਰਮ ਹੈ।
ਧਾਰਮਿਕ ਸਥਾਨਾਂ ’ਤੇ ਵੀ ਰੱਖੀ ਜਾ ਰਹੀ ਨਜ਼ਰ
ਪੁਲਿਸ ਵੱਲੋਂ ਨੇੜਲੇ ਇਲਾਕਿਆਂ ਅਤੇ ਪਿੰਡਾਂ ਵਿੱਚ ਮੁਨਾਦੀ ਕਰਵਾਈ ਗਈ ਹੈ ਤਾਂ ਜੋ ਲੋਕ ਸਾਵਧਾਨ ਰਹਿਣ। ਅਧਿਕਾਰੀਆਂ ਦਾ ਮੰਨਣਾ ਹੈ ਕਿ ਸੰਭਵ ਹੈ ਬੱਚੇ ਕਿਸੇ ਧਾਰਮਿਕ ਸਥਾਨ ਜਾਂ ਲੰਗਰ ਵਾਲੀ ਥਾਂ ’ਤੇ ਰੁਕ ਗਏ ਹੋਣ। ਪੁਲਿਸ ਨੂੰ ਉਮੀਦ ਹੈ ਕਿ ਬੱਚੇ ਜਲਦੀ ਹੀ ਸੁਰੱਖਿਅਤ ਮਿਲ ਜਾਣਗੇ।
2 Children Missing From Outside House In Chandigarh CCTV Footage Surfaced
