PGI ਜਾਣ ਵਾਲੇ ਮਰੀਜ਼ਾਂ ਲਈ ਵੱਡੀ ਖੁਸ਼ਖਬਰੀ; ਹੁਣ ਸਵੇਰੇ ਲਾਈਨਾਂ 'ਚ ਲੱਗਣ ਦਾ ਝੰਜਟ ਖਤਮ, ਘਰ ਬੈਠੇ ਹੋਣਗੇ ਇਹ ਕੰਮ
Chandigarh
PGI ਜਾਣ ਵਾਲੇ ਮਰੀਜ਼ਾਂ ਲਈ ਵੱਡੀ ਖੁਸ਼ਖਬਰੀ; ਹੁਣ ਸਵੇਰੇ ਲਾਈਨਾਂ 'ਚ ਲੱਗਣ ਦਾ ਝੰਜਟ ਖਤਮ, ਘਰ ਬੈਠੇ ਹੋਣਗੇ ਇਹ ਕੰਮ
ਚੰਡੀਗੜ੍ਹ/ਸੰਗਰੂਰ, 2 ਜਨਵਰੀ: ਪੀਜੀਆਈ ਚੰਡੀਗੜ੍ਹ (PGI Chandigarh) ਵਿੱਚ ਇਲਾਜ ਕਰਵਾਉਣ ਲਈ ਆਉਣ ਵਾਲੇ ਹਜ਼ਾਰਾਂ ਮਰੀਜ਼ਾਂ ਲਈ ਬਹੁਤ ਹੀ ਰਾਹਤ ਭਰੀ ਖ਼ਬਰ ਹੈ। ਹੁਣ ਤੁਹਾਨੂੰ ਓਪੀਡੀ ਕਾਰਡ (OPD Card) ਬਣਵਾਉਣ ਲਈ ਸਵੇਰੇ ਤੜਕੇ ਉੱਠ ਕੇ ਲੰਬੀਆਂ ਕਤਾਰਾਂ ਵਿੱਚ ਖੜ੍ਹਨ ਦੀ ਲੋੜ ਨਹੀਂ ਪਵੇਗੀ। ਪੀਜੀਆਈ ਪ੍ਰਸ਼ਾਸਨ ਨੇ ਮਰੀਜ਼ਾਂ ਦੀ ਖੱਜਲ-ਖੁਆਰੀ ਨੂੰ ਖਤਮ ਕਰਨ ਲਈ ਆਪਣੇ ਸਿਸਟਮ ਨੂੰ 'ਡਿਜੀਟਲ' ਕਰ ਦਿੱਤਾ ਹੈ।
ਨਵੇਂ ਸਿਸਟਮ ਦਾ ਟਰਾਇਲ ਸ਼ੁਰੂ
ਪੀਜੀਆਈ ਨੇ ਆਪਣੇ 'ਹਸਪਤਾਲ ਇਨਫਰਮੇਸ਼ਨ ਸਿਸਟਮ' (HIS-2) ਦੇ ਨਵੇਂ ਵਰਜ਼ਨ ਨੂੰ ਸੰਗਰੂਰ ਸੈਟੇਲਾਈਟ ਸੈਂਟਰ (Sangrur Satellite Centre) ਵਿੱਚ ਟਰਾਇਲ ਦੇ ਤੌਰ 'ਤੇ ਲਾਗੂ ਕਰ ਦਿੱਤਾ ਹੈ। ਇੱਥੇ ਸਫਲਤਾ ਮਿਲਣ ਤੋਂ ਤੁਰੰਤ ਬਾਅਦ ਇਸਨੂੰ ਚੰਡੀਗੜ੍ਹ PGI ਵਿੱਚ ਵੀ ਲਾਗੂ ਕਰ ਦਿੱਤਾ ਜਾਵੇਗਾ।
ਇਸ ਨਾਲ ਮਰੀਜ਼ਾਂ ਦੀ ਰਜਿਸਟ੍ਰੇਸ਼ਨ, ਬਿੱਲ ਭਰਨ ਅਤੇ ਹੋਰ ਸਾਰੀਆਂ ਸੇਵਾਵਾਂ ਇੱਕ ਹੀ ਪਲੇਟਫਾਰਮ 'ਤੇ ਮਿਲਣਗੀਆਂ। ਸਭ ਤੋਂ ਵੱਧ ਫਾਇਦਾ ਦੂਰ-ਦੁਰਾਡੇ ਪਿੰਡਾਂ ਤੋਂ ਆਉਣ ਵਾਲੇ ਉਨ੍ਹਾਂ ਮਰੀਜ਼ਾਂ ਨੂੰ ਹੋਵੇਗਾ, ਜੋ ਤਕਨੀਕੀ ਜਾਣਕਾਰੀ ਨਾ ਹੋਣ ਕਾਰਨ ਘੰਟਿਆਂ ਬੱਧੀ ਲਾਈਨਾਂ ਵਿੱਚ ਖੜ੍ਹੇ ਰਹਿੰਦੇ ਸਨ।
ਕੀ-ਕੀ ਸਹੂਲਤਾਂ ਮਿਲਣਗੀਆਂ?
ਨਵੇਂ ਸਿਸਟਮ ਤਹਿਤ ਮਰੀਜ਼ਾਂ ਨੂੰ ਹਾਈਟੈਕ ਸਹੂਲਤਾਂ ਮਿਲਣਗੀਆਂ:
ਆਨਲਾਈਨ ਅਪੁਆਇੰਟਮੈਂਟ: ਘਰ ਬੈਠੇ ਹੀ ਡਾਕਟਰ ਦਾ ਸਮਾਂ ਲਿਆ ਜਾ ਸਕੇਗਾ।
QR ਕੋਡ ਰਜਿਸਟ੍ਰੇਸ਼ਨ: ਲੰਬੇ ਫਾਰਮ ਭਰਨ ਦੀ ਬਜਾਏ ਸਿਰਫ਼ ਕੋਡ ਸਕੈਨ ਕਰਕੇ ਰਜਿਸਟ੍ਰੇਸ਼ਨ ਹੋਵੇਗੀ।
ਰਿਪੋਰਟ ਟ੍ਰੈਕਿੰਗ: ਲੈਬ ਦੀਆਂ ਰਿਪੋਰਟਾਂ ਲਈ ਹਸਪਤਾਲ ਦੇ ਚੱਕਰ ਨਹੀਂ ਕੱਟਣੇ ਪੈਣਗੇ, ਇਹ ਫੋਨ 'ਤੇ ਹੀ ਦੇਖੀਆਂ ਜਾ ਸਕਣਗੀਆਂ।
ਮੋਬਾਈਲ ਐਪ: ਸਾਰੀਆਂ ਸੇਵਾਵਾਂ ਲਈ ਇੱਕ ਵਿਸ਼ੇਸ਼ ਐਪ ਵੀ ਹੋਵੇਗੀ।
ਅਧਿਕਾਰੀਆਂ ਨੇ ਕੀ ਕਿਹਾ?
ਪੀਜੀਆਈ ਦੇ ਡਾਇਰੈਕਟਰ ਪ੍ਰੋ. ਵਿਵੇਕ ਲਾਲ ਨੇ ਕਿਹਾ ਕਿ HIS-2 ਸਿਸਟਮ ਨਾਲ ਪਾਰਦਰਸ਼ਤਾ ਆਵੇਗੀ ਅਤੇ ਮਰੀਜ਼ਾਂ ਨੂੰ ਵੱਖ-ਵੱਖ ਕਾਊਂਟਰਾਂ 'ਤੇ ਭੱਜਣ ਦੀ ਲੋੜ ਨਹੀਂ ਪਵੇਗੀ। ਡਿਪਟੀ ਡਾਇਰੈਕਟਰ ਪੰਕਜ ਰਾਏ ਨੇ ਦੱਸਿਆ ਕਿ ਸੀ-ਡੈਕ (C-DAC) ਨੋਇਡਾ ਵੱਲੋਂ ਤਿਆਰ ਕੀਤੇ ਇਸ ਸਿਸਟਮ ਨੂੰ 1 ਜਨਵਰੀ ਤੋਂ ਸੰਗਰੂਰ ਵਿੱਚ ਸ਼ੁਰੂ ਕਰ ਦਿੱਤਾ ਗਿਆ ਹੈ। ਪਹਿਲੇ ਪੜਾਅ ਵਿੱਚ ਰਜਿਸਟ੍ਰੇਸ਼ਨ, ਬਿੱਲਿੰਗ ਅਤੇ ਦਾਖਲਾ/ਡਿਸਚਾਰਜ ਮੋਡੀਊਲ ਸ਼ੁਰੂ ਕੀਤੇ ਗਏ ਹਨ। ਜਲਦੀ ਹੀ ਡਾਕਟਰ ਡੈਸਕ ਅਤੇ ਲੈਬ ਸੇਵਾਵਾਂ ਵੀ ਜੋੜ ਦਿੱਤੀਆਂ ਜਾਣਗੀਆਂ।
Big News For Patients Going To PGI Now The Hassle Of Standing In Queues In The Morning Is Over This Work Can Be Done Sitting At Home
