ਬਾਕਸ ਆਫ਼ਿਸ 'ਤੇ ਧਮਾਲ ਮਚਾਉਣ ਵਾਲੀ 'ਹਨੂਮਾਨ ਅੰਸ਼' ਦੇ OTT ਰਿਲੀਜ਼ 'ਤੇ ਨਿਰਮਾਤਾ ਰਾਗਿਨੀ ਸੋਨਾ ਦਾ ਵੱਡਾ ਬਿਆਨ
Live Punjabi TV / Mumbai
ਵਿਸ਼ਾਲ ਚਤੁਰਵੇਦੀ ਵੱਲੋਂ ਲਿਖੀ, ਨਿਰਦੇਸ਼ਿਤ ਅਤੇ 'ਸਵੈੰਭੂ ਮੀਡੀਆ ਨੈੱਟਵਰਕ' ਦੇ ਬੈਨਰ ਹੇਠ ਤਿਆਰ ਕੀਤੀ ਗਈ
ਫਿਲਮ ਨੀਮ ਕਰੋਲੀ ਬਾਬਾ ਦੀ ਆਧਿਆਤਮਿਕ ਯਾਤਰਾ 'ਤੇ ਆਧਾਰਿਤ ਹੈ।
ਵੱਡੀਆਂ ਫਿਲਮਾਂ ਦੇ ਫਲਾਪ ਹੋਣ ਦੇ ਦੌਰ ਵਿਚਕਾਰ ਮਹਿਜ਼ 2 ਕਰੋੜ ਰੁਪਏ ਦੇ ਬਜਟ ਵਿੱਚ ਬਣੀ ਫਿਲਮ 'ਹਨੂਮਾਨ ਅੰਸ਼' ਬਾਕਸ ਆਫ਼ਿਸ 'ਤੇ ਸਫ਼ਲਤਾ ਦੇ ਨਵੇਂ ਝੰਡੇ ਗੱਡ ਰਹੀ ਹੈ। ਸਿਨੇਮਾਘਰਾਂ ਵਿੱਚ 48ਵੇਂ ਦਿਨ ਵੀ ਦਰਸ਼ਕਾਂ ਦੀ ਪਹਿਲੀ ਪਸੰਦ ਬਣੀ ਇਸ ਫਿਲਮ ਨੇ ਹੁਣ ਤੱਕ 300 ਕਰੋੜ ਰੁਪਏ ਤੋਂ ਵੱਧ ਦਾ ਸ਼ਾਨਦਾਰ ਕਲੈਕਸ਼ਨ ਕਰਨ ਦਾ ਦਾਅਵਾ ਕੀਤਾ ਹੈ। ਫਿਲਮ ਦੀ ਇਸ ਜ਼ਬਰਦਸਤ ਸਫ਼ਲਤਾ ਦੇ ਵਿਚਕਾਰ ਦਰਸ਼ਕਾਂ ਵਿੱਚ ਇਸ ਦੇ ਓ.ਟੀ.ਟੀ. (OTT) ਪਲੇਟਫਾਰਮ 'ਤੇ ਰਿਲੀਜ਼ ਹੋਣ ਨੂੰ ਲੈ ਕੇ ਉਤਸੁਕਤਾ ਬਣੀ ਹੋਈ ਸੀ, ਜਿਸ 'ਤੇ ਹੁਣ ਫਿਲਮ ਦੀ ਪ੍ਰੋਡਿਊਸਰ ਰਾਗਿਨੀ ਸੋਨਾ ਨੇ ਆਪਣੀ ਚੁੱਪ ਤੋੜੀ ਹੈ।
ਮੀਡੀਆ ਨਾਲ ਗੱਲਬਾਤ ਕਰਦਿਆਂ ਰਾਗਿਨੀ ਸੋਨਾ ਨੇ ਫਿਲਮ ਨੂੰ 100 ਕਰੋੜ ਰੁਪਏ ਦੀ OTT ਡੀਲ ਮਿਲਣ ਦੀਆਂ ਖ਼ਬਰਾਂ ਨੂੰ ਅਫ਼ਵਾਹ ਕਰਾਰ ਦਿੱਤਾ ਹੈ। ਉਨ੍ਹਾਂ ਕਿਹਾ ਕਿ ਫਿਲਮ ਲਈ ਪ੍ਰਸਤਾਵ ਜ਼ਰੂਰ ਆ ਰਹੇ ਹਨ, ਪਰ 100 ਕਰੋੜ ਰੁਪਏ ਦੀ ਡੀਲ ਦੀਆਂ ਅਫ਼ਵਾਹਾਂ ਵਿੱਚ ਕੋਈ ਸੱਚਾਈ ਨਹੀਂ ਹੈ। ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਨਿਰਦੇਸ਼ਕ ਵਿਸ਼ਾਲ ਚਤੁਰਵੇਦੀ ਦੀ ਸਲਾਹ ਅਨੁਸਾਰ ਫਿਲਮ ਦੀ ਓ.ਟੀ.ਟੀ. ਰਿਲੀਜ਼ ਲਈ ਅਜੇ ਕੁਝ ਹੋਰ ਸਮਾਂ ਇੰਤਜ਼ਾਰ ਕੀਤਾ ਜਾਵੇਗਾ। ਪ੍ਰੋਡਿਊਸਰ ਮੁਤਾਬਕ 'ਹਨੂਮਾਨ ਅੰਸ਼' ਵੱਡੇ ਪਰਦੇ 'ਤੇ ਦੇਖਣ ਵਾਲੀ ਫਿਲਮ ਹੈ, ਕਿਉਂਕਿ ਘਰ ਬੈਠ ਕੇ ਦੇਖਣ ਨਾਲ ਇਸ ਦੇ ਆਧਿਆਤਮਿਕ ਅਨੁਭਵ ਅਤੇ ਦਰਸ਼ਕਾਂ ਦੇ ਧਿਆਨ ਵਿੱਚ ਖਲਲ ਪੈ ਸਕਦਾ ਹੈ।
ਦੱਸਣਯੋਗ ਹੈ ਕਿ ਵਿਸ਼ਾਲ ਚਤੁਰਵੇਦੀ ਵੱਲੋਂ ਲਿਖੀ, ਨਿਰਦੇਸ਼ਿਤ ਅਤੇ 'ਸਵੈੰਭੂ ਮੀਡੀਆ ਨੈੱਟਵਰਕ' ਦੇ ਬੈਨਰ ਹੇਠ ਤਿਆਰ ਕੀਤੀ ਗਈ ਇਹ ਫਿਲਮ ਨੀਮ ਕਰੋਲੀ ਬਾਬਾ ਦੀ ਆਧਿਆਤਮਿਕ ਯਾਤਰਾ 'ਤੇ ਆਧਾਰਿਤ ਹੈ। ਫਿਲਮ ਦੀ ਕਹਾਣੀ ਉਨ੍ਹਾਂ ਦੀ ਚਰਚਿਤ ਕਿਤਾਬ 'ਦਿਵਿਆ ਯਾਤਰਾ: ਜਿਸ ਨੇ ਮੇਰੀ ਜ਼ਿੰਦਗੀ ਬਦਲ ਦਿੱਤੀ' ਤੋਂ ਪ੍ਰੇਰਿਤ ਹੈ। ਫਿਲਮ ਦੇ ਨਿਰਮਾਤਾਵਾਂ ਨੇ ਭਰੋਸਾ ਦਿਵਾਇਆ ਹੈ ਕਿ ਓ.ਟੀ.ਟੀ. ਡੀਲ ਬਾਰੇ ਅਧਿਕਾਰਤ ਐਲਾਨ ਬਹੁਤ ਜਲਦ ਕੀਤਾ ਜਾਵੇਗਾ, ਪਰ ਫਿਲਹਾਲ ਦਰਸ਼ਕਾਂ ਨੂੰ ਸਿਨੇਮਾਘਰਾਂ ਵਿੱਚ ਹੀ ਇਸ ਦਾ ਅਨੰਦ ਮਾਨਣਾ ਚਾਹੀਦਾ ਹੈ।
Producer Ragini Sona s Major Statement Regarding The OTT Release Of The Box office Sensation Hanuman Ansh
