ਧੌਣ ਤੋਂ ਲਗਭਗ ਵੱਖ ਹੋ ਚੁੱਕਿਆ ਸਿਰ ਦੁਬਾਰਾ ਜੋੜ ਕੇ ਡਾਕਟਰਾਂ ਨੇ ਕੀਤਾ ਚਮਤਕਾਰ!
LPTV / Chandigarh
ਅਜਬ ਗਜਬ : ਕਈ ਵਾਰ ਡਾਕਟਰਾਂ ਕੋਲ ਅਜਿਹੇ ਕੇਸ ਸਾਹਮਣੇ ਆ ਜਾਂਦੇ ਜਿਸ ਨੂੰ ਦੇਖ ਕੇ ਇਕ ਵਾਰ ਤਾਂ ਉਨ੍ਹਾਂ ਦੀ ਵੀ ਰੂਹ ਕੰਬ ਜਾਂਦੀ ਹੈ। ਡਾਕਟਰਾਂ ਨੂੰ ਰੱਬ ਦਾ ਦੂਜਾ ਰੂਪ ਮੰਨਿਆ ਜਾਂਦਾ ਹੈ। ਕਈ ਵਾਰ ਡਾਕਟਰ ਅਜਿਹੇ ਚਮਤਕਾਰ ਕਰ ਦਿੰਦੇ ਹਨ ਕਿ ਯਕੀਨ ਕਰਨਾ ਮੁਸ਼ਕਿਲ ਹੋ ਜਾਂਦਾ ਹੈ। ਅਜਿਹਾ ਹੀ ਇੱਕ ਮਾਮਲਾ ਇਜ਼ਰਾਈਲ ਵਿੱਚ ਦੇਖਣ ਨੂੰ ਮਿਲਿਆ ਹੈ, ਜਿੱਥੇ ਡਾਕਟਰਾਂ ਨੇ ਇੱਕ 12 ਸਾਲ ਦੇ ਮੁੰਡੇ ਦੇ ਸਿਰ ਨੂੰ ਉਸ ਦੀ ਧੌਣ ਨਾਲ ਦੁਬਾਰਾ ਜੋੜਨ ਵਿੱਚ ਸਫਲਤਾ ਹਾਸਲ ਕੀਤੀ ਹੈ।
ਇਸ ਤਰ੍ਹਾਂ ਵਾਪਰਿਆ ਸੀ ਬੱਚੇ ਨਾਲ ਹਾਦਸਾ
ਇੱਕ ਰਿਪੋਰਟ ਮੁਤਾਬਕ ਸੁਲੇਮਾਨ ਹਸਨ ਨਾਂ ਦਾ 12 ਸਾਲਾਂ ਲੜਕਾ ਹਾਦਸੇ ਦਾ ਸ਼ਿਕਾਰ ਹੋਇਆ। ਜਿਸ ਵਿੱਚ ਬੱਚੇ ਦਾ ਸਿਰ ਉਸ ਦੀ ਗਰਦਨ ਤੋਂ ਵੱਖ ਹੋ ਗਿਆ ਸੀ। ਇਹ ਹਾਦਸਾ ਉਸ ਸਮੇਂ ਵਾਪਰਿਆ ਜਦੋਂ ਬੱਚੇ ਨੂੰ ਸਾਈਕਲ ਚਲਾਉਂਦੇ ਸਮੇਂ ਕਾਰ ਨੇ ਟੱਕਰ ਮਾਰ ਦਿੱਤੀ, ਜਿਸ ਵਿੱਚ ਉਹ ਗੰਭੀਰ ਜ਼ਖ਼ਮੀ ਹੋ ਗਿਆ। ਬੱਚੇ ਦੀ ਨਾਜ਼ੁਕ ਹਾਲਤ ਨੂੰ ਦੇਖਦੇ ਹੋਏ ਉਸ ਨੂੰ ਹਵਾਈ ਜਹਾਜ਼ ਰਾਹੀਂ ਹਦਸਾਹ ਮੈਡੀਕਲ ਸੈਂਟਰ ਲਿਜਾਇਆ ਗਿਆ, ਜਿੱਥੇ ਉਸ ਨੂੰ ਐਮਰਜੈਂਸੀ ਸਰਜਰੀ ਲਈ ਭੇਜਿਆ ਗਿਆ।
ਬਹੁਤ ਹੀ ਗੁੰਝਲਦਾਰ ਸੀ ਸਰਜਰੀ
ਡਾਕਟਰਾਂ ਮੁਤਾਬਕ ਉਸ ਦਾ ਸਿਰ ਗਰਦਨ ਦੇ ਹੇਠਲੇ ਹਿੱਸੇ ਤੋਂ ਲਗਭਗ ਪੂਰੀ ਤਰ੍ਹਾਂ ਕੱਟਿਆ ਗਿਆ ਸੀ। ਡਾਕਟਰ ਓਹਦ ਇਨਾਵ, ਇੱਕ ਆਰਥੋਪੀਡਿਕ ਸਰਜਨ ਜੋ ਬੱਚੇ ਦੀ ਸਰਜਰੀ ਟੀਮ ਦਾ ਹਿੱਸਾ ਸੀ, ਨੇ ਇੱਕ ਨਿਊਜ਼ ਚੈਨਲ ਨੂੰ ਦੱਸਿਆ ਕਿ ਇਹ ਇੱਕ ਬਹੁਤ ਹੀ ਗੁੰਝਲਦਾਰ ਸਰਜਰੀ ਸੀ। ਸਾਨੂੰ ਬਿਲਕੁਲ ਨਹੀਂ ਪਤਾ ਸੀ ਕਿ ਅਸੀਂ ਇਸ ਵਿੱਚ ਕਾਮਯਾਬ ਹੋ ਸਕਾਂਗੇ ਜਾਂ ਨਹੀਂ। ਪਰ ਅਸੀਂ ਹਾਰ ਨਹੀਂ ਮੰਨੀ, ਇਸ ਗੁੰਝਲਦਾਰ ਸਰਜਰੀ ਨੂੰ ਕਈ ਘੰਟੇ ਲੱਗ ਗਏ। ਪਰ ਹੁਣ ਨਤੀਜਾ ਦੇਖ ਕੇ ਪੂਰੀ ਟੀਮ ਬਹੁਤ ਖੁਸ਼ ਹੈ।
ਪਿਛਲੇ ਮਹੀਨੇ ਯਾਨੀ ਜੂਨ ਮਹੀਨੇ ਦੀ ਇਹ ਘਟਨਾ
ਰਿਪੋਰਟ ਮੁਤਾਬਕ ਇਹ ਘਟਨਾ ਪਿਛਲੇ ਮਹੀਨੇ ਯਾਨੀ ਜੂਨ ਮਹੀਨੇ ਦੀ ਹੈ ਪਰ ਡਾਕਟਰਾਂ ਨੇ ਇਸ ਘਟਨਾ ਨੂੰ ਜੁਲਾਈ ਤੱਕ ਜਨਤਕ ਨਹੀਂ ਕੀਤਾ। ਸਰਜਨਾਂ ਦਾ ਇਹ ਵੀ ਮੰਨਣਾ ਹੈ ਕਿ ਉਸ ਦਾ ਠੀਕ ਹੋਣਾ ਕਿਸੇ ਚਮਤਕਾਰ ਤੋਂ ਘੱਟ ਨਹੀਂ ਸੀ ਕਿਉਂਕਿ ਲੜਕੇ ਦੇ ਬਚਣ ਦੀ ਸੰਭਾਵਨਾ ਘੱਟ ਸੀ। ਰਿਪੋਰਟ ਮੁਤਾਬਕ ਹਾਦਸੇ ਦਾ ਸ਼ਿਕਾਰ ਹੋਏ ਬੱਚੇ ਨੂੰ ਹੁਣ ਇਲਾਜ ਤੋਂ ਬਾਅਦ ਹਸਪਤਾਲ ਤੋਂ ਛੁੱਟੀ ਦੇ ਦਿੱਤੀ ਗਈ ਹੈ। ਹਾਲਾਂਕਿ, ਹਸਪਤਾਲ ਬੱਚੇ ਦੀ ਸਿਹਤਯਾਬੀ ਦੀ ਨਿਗਰਾਨੀ ਕਰਨਾ ਜਾਰੀ ਰੱਖਦਾ ਹੈ।
The doctors performed a miracle by reattaching the head that was almost separated from Dhaun
