ASMI Machine Pistol- ਹੁਣ ਦੁਸ਼ਮਣਾਂ ਦੀ ਖੈਰ ਨਹੀਂ, ਭਾਰਤੀ ਫੌਜ ਨੂੰ ਮਿਲੀ ASMI ਪਿਸਤੌਲ, 100 ਮੀਟਰ ਤੱਕ ਨਿਸ਼ਾਨਾ, ਇਕ ਵਾਰ 'ਚ 33 ਰਾਊਂਡ
Admin / National
ਲਾਈਵ ਪੰਜਾਬੀ ਟੀਵੀ ਬਿਊਰੋ : ਭਾਰਤੀ ਫੌਜ ਆਪਣੇ ਆਧੁਨਿਕੀਕਰਨ ਵਜੋਂ ਸਵਦੇਸ਼ੀ ਹਥਿਆਰਾਂ ਨੂੰ ਪਹਿਲ ਦੇ ਰਹੀ ਹੈ ਅਤੇ ਸਵਦੇਸ਼ੀ ਕੰਪਨੀਆਂ ਤੋਂ ਵੱਧ ਤੋਂ ਵੱਧ ਹਥਿਆਰ ਖਰੀਦਣ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ। ਇਸੇ ਤਹਿਤ 100 ਫੀਸਦੀ ਸਵਦੇਸ਼ੀ ਮਸ਼ੀਨ ਪਿਸਤੌਲ ਨੂੰ ਭਾਰਤੀ ਫੌਜ ਵਿਚ ਸ਼ਾਮਲ ਕਰ ਲਿਆ ਗਿਆ ਹੈ। ਇਸ ਮਸ਼ੀਨ ਪਿਸਤੌਲ ਦਾ ਨਾਂ 'ਅਸਮੀ' (Asmi)ਹੈ। ਇਸ ਮਸ਼ੀਨ ਪਿਸਟਲ ਨੂੰ ਭਾਰਤੀ ਫੌਜ ਦੇ ਸਰਵਿੰਗ ਕਰਨਲ ਪ੍ਰਸਾਦ ਬੰਸੌਦ ਨੇ ਡੀਆਰਡੀਓ ਦੇ ਸਹਿਯੋਗ ਨਾਲ ਤਿਆਰ ਕੀਤਾ ਹੈ।
ਲੋਕੇਸ਼ ਨਾਂ ਦੀ ਕੰਪਨੀ ਨੇ ਕੀਤਾ ਹੈ ਤਿਆਰ
ਦੱਸਿਆ ਜਾ ਰਿਹਾ ਹੈ ਕਿ ਹੈਦਰਾਬਾਦ ਦੀ ਲੋਕੇਸ਼ ਨਾਂ ਦੀ ਕੰਪਨੀ ਇਸ ਪਿਸਤੌਲ ਦਾ ਨਿਰਮਾਣ ਕਰ ਰਹੀ ਹੈ। ਫੌਜ ਦੀ ਉੱਤਰੀ ਕਮਾਂਡ ਵਿਚ ਤਾਇਨਾਤ ਜਵਾਨਾਂ ਲਈ 550 ASMI ਮਸ਼ੀਨ ਪਿਸਤੌਲਾਂ ਦੀ ਖਰੀਦ ਕੀਤੀ ਗਈ ਹੈ ਅਤੇ ਡਿਲੀਵਰੀ ਵੀ ਕੀਤੀ ਜਾ ਚੁੱਕੀ ਹੈ। ਇਸ ਮਸ਼ੀਨ ਪਿਸਤੌਲ ਦੀ ਖਾਸ ਗੱਲ ਇਹ ਹੈ ਕਿ ਇਹ ਕਰੀਬੀ ਲੜਾਈ ਲਈ ਇਕ ਮਜ਼ਬੂਤ, ਕਮਪੈਕਟ ਅਤੇ ਭਰੋਸੇਮੰਦ ਹਥਿਆਰ ਹੈ। ਅਸਮੀ ਭਾਰਤ ਦੀ ਪਹਿਲੀ ਸਵਦੇਸ਼ੀ 9 ਐੱਮਐੱਮ ਮਸ਼ੀਨ ਪਿਸਟਲ ਹੈ। ਇਹ ਭਾਰਤੀ ਫੌਜ ਵਿਚ ਪੈਦਲ ਫੌਜ ਦੀ ਫਾਇਰ ਪਾਵਰ ਨੂੰ ਵਧਾਉਣ ਲਈ ਦਿੱਤਾ ਗਿਆ ਹੈ। ਫੌਜ ਦੀ ਉੱਤਰੀ ਕਮਾਨ ਨੇ ਆਰਮੀ ਕਮਾਂਡਰ ਦੀ ਵਿਸ਼ੇਸ਼ ਵਿੱਤੀ ਸ਼ਕਤੀ ਦੇ ਤਹਿਤ 550 ਅਸਮੀ ਪਿਸਤੌਲ ਖਰੀਦੀ ਹੈ।
ਦੋਵਾਂ ਹੱਥਾਂ ਨਾਲ ਚਲਾਉਣਾ ਆਸਾਨ
ਅਜਿਹੇ ਹਲਕੇ ਅਤੇ ਛੋਟੇ ਮਸ਼ੀਨ ਪਿਸਤੌਲਾਂ ਦੀ ਅੱਤਵਾਦ ਵਿਰੋਧੀ ਕਾਰਵਾਈਆਂ ਲਈ ਬਹੁਤ ਲੋੜ ਹੁੰਦੀ ਹੈ। ਜੇਕਰ ਅਸੀਂ ਇਸਦੀ ਰੇਂਜ ਦੀ ਗੱਲ ਕਰੀਏ ਤਾਂ ਇਹ 100 ਮੀਟਰ ਤੱਕ ਸਟੀਕ ਨਿਸ਼ਾਨਾ ਲਗਾ ਸਕਦਾ ਹੈ ਅਤੇ ਇੱਕ ਮੈਗਜ਼ੀਨ ਵਿੱਚ 33 ਗੋਲੀਆਂ ਆਉਂਦੀਆਂ ਹਨ। ਇਸ 'ਤੇ ਟੈਲੀਸਕੋਪ, ਲੇਜ਼ਰ ਬੀਮ, ਦੂਰਬੀਨ ਆਸਾਨੀ ਨਾਲ ਲਗਾਏ ਜਾ ਸਕਦੇ ਹਨ, ਜਿਸ ਨਾਲ ਆਪਰੇਸ਼ਨ ਬਹੁਤ ਆਸਾਨ ਹੋ ਜਾਂਦਾ ਹੈ। ਖਾਸ ਗੱਲ ਇਹ ਹੈ ਕਿ ਇਸ ਮਸ਼ੀਨ ਪਿਸਤੌਲ ਦੀ ਲੋਡਿੰਗ ਸਵਿੱਚ ਦੋਵੇਂ ਪਾਸੇ ਹੁੰਦੀ ਹੈ, ਭਾਵ ਖੱਬੇ ਹੱਥ ਦੀ ਹੋਵੇ ਜਾਂ ਸੱਜੇ ਹੱਥ ਦੀ, ਦੋਵਾਂ ਲਈ ਇਸ ਪਿਸਤੌਲ ਨੂੰ ਚਲਾਉਣਾ ਆਸਾਨ ਹੁੰਦਾ ਹੈ।
ਪਿਸਤੌਲ ਦੇ ਬੱਟ ਨੂੰ ਫੋਲਡ ਕੀਤਾ ਜਾ ਸਕਦਾ ਹੈ, ਜਿਸ ਕਾਰਨ ਇਸ ਦਾ ਆਕਾਰ ਛੋਟਾ ਹੋ ਜਾਂਦਾ ਹੈ। ਇਸ ਪਿਸਤੌਲ ਨੂੰ ਆਸਾਨੀ ਨਾਲ ਲੁਕਾ ਕੇ ਲਿਜਾਇਆ ਜਾ ਸਕਦਾ ਹੈ ਅਤੇ ਇਸ ਨੂੰ ਪਿਸਤੌਲ ਵਜੋਂ ਵਰਤਿਆ ਜਾ ਸਕਦਾ ਹੈ। ਇੰਨਾ ਹੀ ਨਹੀਂ ਆਮ ਰਾਈਫਲ ਵਾਂਗ ਇਸ ਨੂੰ ਮੋਢੇ 'ਤੇ ਰੱਖ ਕੇ ਵੀ ਫਾਇਰ ਕੀਤਾ ਜਾ ਸਕਦਾ ਹੈ। ਉੱਤਰੀ ਕਮਾਨ ਵਿਚ ਸ਼ਹਿਰੀ ਖੇਤਰਾਂ ਵਿਚ ਦਹਿਸ਼ਤਗਰਦਾਂ ਖ਼ਿਲਾਫ਼ ਕਾਰਵਾਈਆਂ ਲਈ ਇਹ ਸਭ ਤੋਂ ਵਧੀਆ ਹਥਿਆਰ ਹੈ।
Indian Army Gets ASMI Pistol 100m Target 33 Rounds At A Time
