Chandigarh 'ਚ ਨਵੀਂ ਆਬਕਾਰੀ ਨੀਤੀ 2025-26 ਜਾਰੀ, ਇਸ ਦਿਨ ਤੋਂ ਸ਼ੁਰੂ ਹੋਵੇਗੀ ਠੇਕਿਆਂ ਦੀ ਈ-ਨਿਲਾਮੀ
Admin / Punjab
ਲਾਈਵ ਪੰਜਾਬੀ ਟੀਵੀ ਬਿਊਰੋ : ਚੰਡੀਗੜ੍ਹ ਪ੍ਰਸ਼ਾਸਨ ਨੇ ਨਵੀਂ ਆਬਕਾਰੀ ਨੀਤੀ 2025-26 ਜਾਰੀ ਕਰ ਦਿੱਤੀ ਹੈ। ਸ਼ਰਾਬ ਦੀਆਂ ਕੀਮਤਾਂ ਨਹੀਂ ਵਧਾਈਆਂ ਜਾਣਗੀਆਂ ਪਰ ਦੇਸੀ ਤੇ ਵਿਦੇਸ਼ੀ ਸ਼ਰਾਬ ਦਾ ਕੋਟਾ ਵਧਾ ਦਿੱਤਾ ਗਿਆ ਹੈ। ਆਬਕਾਰੀ ਵਿਭਾਗ 97 ਸ਼ਰਾਬ ਦੇ ਠੇਕਿਆਂ ਦੀ ਨਿਲਾਮੀ ਕਰੇਗਾ, ਜਿਸ ਵਿੱਚ ਸਭ ਤੋਂ ਮਹਿੰਗਾ ਠੇਕਾ ਪਲਸੋਰਾ ਦਾ ਹੋਵੇਗਾ। ਇਸ ਦੀ ਕੀਮਤ 10.22 ਕਰੋੜ ਰੁਪਏ ਰੱਖੀ ਗਈ ਹੈ।
ਠੇਕਿਆਂ ਦੀ ਅਲਾਟਮੈਂਟ ਲਈ ਈ-ਟੈਂਡਰਿੰਗ ਪ੍ਰਣਾਲੀ ਲਾਗੂ ਕੀਤੀ ਜਾਵੇਗੀ ਅਤੇ ਈ-ਨਿਲਾਮੀ 13 ਮਾਰਚ ਤੋਂ ਸ਼ੁਰੂ ਹੋਵੇਗੀ। ਇੰਡੀਅਨ ਮੇਡ ਫੌਰੇਨ ਲਿਕਰ ਦਾ ਕੋਟਾ ਪਹਿਲਾਂ ਵਾਂਗ ਹੀ ਰਹੇਗਾ। ਦੇਸੀ ਸ਼ਰਾਬ ਦਾ ਕੋਟਾ 18 ਲੱਖ ਤੋਂ ਵਧਾ ਕੇ 20 ਲੱਖ ਪਰੂਫ ਲੀਟਰ, ਵਿਦੇਸ਼ੀ ਸ਼ਰਾਬ ਦਾ ਕੋਟਾ 6.8 ਲੱਖ ਤੋਂ ਵਧਾ ਕੇ 8 ਲੱਖ ਪਰੂਫ ਲੀਟਰ ਤੇ ਇੰਡੀਅਨ ਮੇਡ ਵਿਦੇਸ਼ੀ ਸ਼ਰਾਬ ਦਾ ਕੋਟਾ 117.40 ਲੱਖ ਪਰੂਫ ਲੀਟਰ ਰੱਖਿਆ ਗਿਆ ਹੈ। ਉਥੇ ਹੀ ਹੁਣ ਐੱਲ-1ਐੱਫ ਲਾਇਸੈਂਸ ਲਈ ਇਕ ਸਾਲ ਦਾ ਤਜਰਬਾ ਲਾਜ਼ਮੀ ਕਰ ਦਿੱਤਾ ਗਿਆ ਹੈ। ਪਹਿਲਾਂ ਦੀ ਤਰ੍ਹਾਂ ਸ਼ਰਾਬ ਦੇ ਠੇਕਿਆਂ ਦੀ ਨਿਲਾਮੀ 'ਚ ਹਿੱਸਾ ਲੈਣ ਲਈ 2 ਲੱਖ ਰੁਪਏ ਦੇਣੇ ਪੈਣਗੇ। ਹਾਲਾਂਕਿ ਬਰਾਮਦ ਡਿਊਟੀ 'ਚ ਥੋੜ੍ਹਾ ਵਾਧਾ ਕੀਤਾ ਗਿਆ ਹੈ। ਵਿਭਾਗ ਨੇ ਸਪੱਸ਼ਟ ਕੀਤਾ ਹੈ ਕਿ ਜੇਕਰ ਕੋਈ ਸ਼ਰਾਬ ਵੇਚਦੇ ਸਮੇਂ ਨਿਰਧਾਰਤ ਕੀਮਤਾਂ ਦੀ ਉਲੰਘਣਾ ਕਰਦਾ ਹੈ ਤਾਂ ਠੇਕੇ ਨੂੰ ਤਿੰਨ ਦਿਨਾਂ ਲਈ ਸੀਲ ਕਰ ਦਿੱਤਾ ਜਾਵੇਗਾ।
800 ਕਰੋੜ ਰੁਪਏ ਕਮਾਉਣ ਦਾ ਟੀਚਾ, ਪਿਛਲੀ ਵਾਰ ਰੱਖਿਆ ਸੀ 1000 ਕਰੋੜ
ਪਿਛਲੇ ਸਾਲ ਪ੍ਰਸ਼ਾਸਨ ਨੇ 97 ਠੇਕਿਆਂ ਦੀ ਨਿਲਾਮੀ ਕਰਕੇ ਕਰੀਬ 1000 ਕਰੋੜ ਰੁਪਏ ਕਮਾਉਣ ਦਾ ਟੀਚਾ ਰੱਖਿਆ ਸੀ ਪਰ ਸਿਰਫ਼ 89 ਠੇਕੇ ਹੀ ਵਿਕੇ। ਬਾਅਦ ਵਿੱਚ ਚਾਰ ਠੇਕੇ ਵੀ ਬੰਦ ਕਰ ਦਿੱਤੇ ਗਏ। ਅਜਿਹੇ 'ਚ ਆਬਕਾਰੀ ਵਿਭਾਗ ਨੂੰ ਮਹਿਜ਼ 743 ਕਰੋੜ ਰੁਪਏ ਦੀ ਆਮਦਨ ਹੋਈ ਸੀ। ਇਸ ਵਾਰ ਪ੍ਰਸ਼ਾਸਨ ਨੇ 800 ਕਰੋੜ ਰੁਪਏ ਜੁਟਾਉਣ ਦਾ ਟੀਚਾ ਰੱਖਿਆ ਹੈ। ਉਧਰ, ਸ਼ਰਾਬ ਵੇਚਣ ਵਾਲਿਆਂ ਦਾ ਕਹਿਣਾ ਹੈ ਕਿ ਇਸ ਵਾਰ ਵੀ ਮਹਿਕਮੇ ਦੇ ਸਾਰੇ ਠੇਕੇ ਨਹੀਂ ਵਿਕਣਗੇ ਕਿਉਂਕਿ ਸ਼ਰਾਬ ਵੇਚਣ ਵਾਲਿਆਂ ਵੱਲੋਂ ਮੰਗੀ ਰਾਹਤ ਨਹੀਂ ਮਿਲੀ ਹੈ। ਸਸਤੀ ਸ਼ਰਾਬ ਕਾਰਨ ਠੇਕੇਦਾਰ ਪੰਜਾਬ ਵੱਲ ਰੁਖ ਕਰ ਰਹੇ ਹਨ।
New Excise Policy 2025 26 Released In Chandigarh E auction Of Contracts Will Start From This Day
