ਲੌਂਗਵਿਊ ਕੈਮੀਕਲ ਟੈਂਕ ਧਮਾਕੇ ਵਿੱਚ 1 ਦੀ ਮੌਤ, 9 ਜਖਮੀ
ਲੌਂਗਵਿਊ ਕੈਮੀਕਲ ਟੈਂਕ ਧਮਾਕੇ ਵਿੱਚ 1 ਦੀ ਮੌਤ, 9 ਜਖਮੀ
ਲੌਂਗਵਿਊ, ਵਾਸ਼ਿੰਗਟਨ (longview)— ਮੰਗਲਵਾਰ ਸਵੇਰੇ ਵਾਸ਼ਿੰਗਟਨ ਸਟੇਟ ਦੇ ਲੌਂਗਵਿਊ ਸ਼ਹਿਰ ਵਿੱਚ ਸਥਿਤ ਨਿਪਪੋਨ ਪੇਪਰ ਮਿੱਲ ਵਿੱਚ ਇੱਕ ਕੈਮੀਕਲ ਟੈਂਕ ਦੇ ਧਮਾਕੇ ਵਿਚ ਇੱਕ ਵਿਅਕਤੀ ਦੀ ਮੌਤ ਹੋ ਗਈ ਜਦਕਿ 9 ਹੋਰ ਜਖਮੀ ਹੋ ਗਏ।
ਲਾਂਗਵਿਊ ਫਾਇਰ ਡਿਪਾਰਟਮੈਂਟ ਮੁਤਾਬਕ ਇਹ ਘਟਨਾ ਸਵੇਰੇ ਕਰੀਬ 7:18 ਵਜੇ ਇੰਡਸਟਰੀਅਲ ਵੇ ‘ਤੇ ਸਥਿਤ ਨਿਪਪੋਨ ਫੈਸਿਲਟੀ ਵਿੱਚ ਵਾਪਰੀ। ਇਹ ਫੈਕਟਰੀ ਟਿਸ਼ੂ ਪੇਪਰ, ਪ੍ਰਿੰਟਿੰਗ ਪੇਪਰ ਅਤੇ ਹੋਰ ਕਾਗਜ਼ੀ ਉਤਪਾਦ ਤਿਆਰ ਕਰਦੀ ਹੈ।
ਅਧਿਕਾਰੀਆਂ ਅਨੁਸਾਰ ਕੈਮੀਕਲ ਟ੍ਰੀਟਮੈਂਟ ਵਾਲੇ ਵੱਡੇ ਟੈਂਕ ਵਿੱਚ ਅੰਦਰੂਨੀ ਧਮਾਕਾ (ਇੰਪਲੋਜ਼ਨ) ਹੋਇਆ, ਜਿਸ ਕਾਰਨ ਕਈ ਕਰਮਚਾਰੀ ਕੈਮੀਕਲ ਸੜਨ ਅਤੇ ਹੋਰ ਗੰਭੀਰ ਚੋਟਾਂ ਦਾ ਸ਼ਿਕਾਰ ਹੋਏ। ਜਖਮੀਆਂ ਨੂੰ ਇਲਾਕਾਈ ਹਸਪਤਾਲਾਂ ਵਿੱਚ ਦਾਖਲ ਕਰਵਾਇਆ ਗਿਆ ਹੈ।
ਕੌਲਿਟਜ਼ ਕਾਊਂਟੀ ਸ਼ੇਰਿਫ ਦਫ਼ਤਰ ਨੇ ਪੁਸ਼ਟੀ ਕੀਤੀ ਕਿ ਇਸ ਘਟਨਾ ਵਿੱਚ ਇੱਕ ਵਿਅਕਤੀ ਦੀ ਮੌਤ ਹੋਈ ਹੈ। ਜਖਮੀਆਂ ਵਿੱਚ ਇੱਕ ਫਾਇਰਫਾਈਟਰ ਅਤੇ ਅੱਠ ਕਰਮਚਾਰੀ ਸ਼ਾਮਲ ਹਨ।
ਬਾਅਦ ਵਿੱਚ ਅਧਿਕਾਰੀਆਂ ਨੇ ਦੱਸਿਆ ਕਿ ਟੈਂਕ ਵਿੱਚ “ਵਾਈਟ ਲਿਕਰ” ਨਾਮਕ ਬਹੁਤ ਖ਼ਤਰਨਾਕ ਅਤੇ ਤੇਜ਼ਾਬੀ ਕੈਮੀਕਲ ਮੌਜੂਦ ਸੀ, ਜੋ ਸੋਡੀਅਮ ਹਾਈਡਰਾਕਸਾਈਡ ਅਤੇ ਸੋਡੀਅਮ ਸਲਫਾਈਡ ਦਾ ਮਿਸ਼ਰਣ ਹੁੰਦਾ ਹੈ। ਇਹ ਕੈਮੀਕਲ ਪੇਪਰ ਬਣਾਉਣ ਦੌਰਾਨ ਲੱਕੜ ਦੇ ਰੇਸ਼ਿਆਂ ਨੂੰ ਘੋਲਣ ਲਈ ਵਰਤਿਆ ਜਾਂਦਾ ਹੈ।
ਸ਼ੁਰੂਆਤੀ ਜਾਣਕਾਰੀ ਮੁਤਾਬਕ ਟੈਂਕ ਵਿੱਚ ਲਗਭਗ 80 ਹਜ਼ਾਰ ਗੈਲਨ ਕੈਮੀਕਲ ਹੋਣ ਦਾ ਅੰਦਾਜ਼ਾ ਸੀ, ਪਰ ਹੁਣ ਅਧਿਕਾਰੀਆਂ ਨੇ ਦੱਸਿਆ ਕਿ ਟੈਂਕ ਵਿੱਚ ਕਰੀਬ 9 ਲੱਖ ਗੈਲਨ “ਵਾਈਟ ਲਿਕਰ” ਮੌਜੂਦ ਸੀ। ਫਾਇਰ ਵਿਭਾਗ ਦੇ ਅਨੁਸਾਰ ਹਾਦਸੇ ਤੋਂ ਬਾਅਦ ਵੀ ਲਗਭਗ 90 ਹਜ਼ਾਰ ਗੈਲਨ ਕੈਮੀਕਲ ਟੈਂਕ ਵਿੱਚ ਬਚਿਆ ਹੋਇਆ ਹੈ।
ਫਾਇਰਫਾਈਟਰ ਅਤੇ ਹੈਜ਼ਮੈਟ ਟੀਮ ਨਿਪਪੋਨ ਕੰਪਨੀ ਦੇ ਕਰਮਚਾਰੀਆਂ ਨਾਲ ਮਿਲ ਕੇ ਰਸਾਇਣਕ ਰਿਸਾਅ ਨੂੰ ਕਾਬੂ ਕਰਨ ਲਈ ਕੰਮ ਕਰ ਰਹੇ ਹਨ। ਸੁਰੱਖਿਆ ਕਾਰਨਾਂ ਕਰਕੇ ਬਚਾਅ ਅਤੇ ਰਿਕਵਰੀ ਕਾਰਵਾਈ ਬੁੱਧਵਾਰ ਤੱਕ ਮੁਲਤਵੀ ਕਰ ਦਿੱਤੀ ਗਈ ਹੈ।
ਅਧਿਕਾਰੀਆਂ ਨੇ ਕਿਹਾ ਹੈ ਕਿ ਇਸ ਵੇਲੇ ਆਮ ਲੋਕਾਂ ਲਈ ਕੋਈ ਤੁਰੰਤ ਖ਼ਤਰਾ ਨਹੀਂ ਹੈ, ਪਰ ਲੋਕਾਂ ਨੂੰ ਇੰਡਸਟਰੀਅਲ ਵੇ ਇਲਾਕੇ ਤੋਂ ਦੂਰ ਰਹਿਣ ਦੀ ਅਪੀਲ ਕੀਤੀ ਗਈ ਹੈ।
Longview Chemical Tank Explosion
