ਇੱਕ ਕਿਲੋ ਸੋਨਾ ਗਾਇਬ ਕਰਨ ਦੇ ਦੋਸ਼ ਚ ਪਿਤਾ ਗ੍ਰਿਫ਼ਤਾਰ, ਪੁੱਤ ਦੀ ਸ਼ਿਕਾਇਤ ’ਤੇ ਕੇਸ ਦਰਜ
Lptv News / Panjab
ਮੁਲਜ਼ਮ ਸ਼ਕਤੀ ਪ੍ਰਸ਼ਾਦ ਸਿੰਘੀ ਦਾ ਇੱਕ ਦਿਨ ਦਾ ਰਿਮਾਂਡ ਲੈ ਕੇ ਪੁੱਛਗਿੱਛ ਸ਼ੁਰੂ ਕਰ ਦਿੱਤੀ ਹੈ
ਡੇਢ ਮਹੀਨੇ ਤੱਕ ਟਾਲਮਟੋਲ ਕਰਨ ਤੋਂ ਬਾਅਦ ਜਦੋਂ ਦੋਵੇਂ ਸੋਨਾ ਕੱਢਣ ਗਏ ਤਾਂ ਉੱਥੇ ਸੋਨਾ ਮੌਜੂਦ ਨਹੀਂ ਸੀ
ਥਾਣਾ ਸਰਹਿੰਦ ਪੁਲਿਸ ਨੇ ਇੱਕ ਕਿਲੋ ਸੋਨਾ ਚੋਰੀ ਕਰਨ ਦੇ ਦੋਸ਼ ਹੇਠ ਪੁੱਤਰ ਦੀ ਸ਼ਿਕਾਇਤ ’ਤੇ ਉਸ ਦੇ ਪਿਤਾ ਖ਼ਿਲਾਫ਼ ਮਾਮਲਾ ਦਰਜ ਕਰਕੇ ਗ੍ਰਿਫ਼ਤਾਰ ਕੀਤਾ ਹੈ। ਪੁਲਿਸ ਨੇ ਮੁਲਜ਼ਮ ਸ਼ਕਤੀ ਪ੍ਰਸ਼ਾਦ ਸਿੰਘੀ ਦਾ ਇੱਕ ਦਿਨ ਦਾ ਰਿਮਾਂਡ ਲੈ ਕੇ ਪੁੱਛਗਿੱਛ ਸ਼ੁਰੂ ਕਰ ਦਿੱਤੀ ਹੈ। ਥਾਣਾ ਸਰਹਿੰਦ ਦੇ ਐੱਸਐੱਚਓ ਅਸ਼ੋਕ ਕੁਮਾਰ ਮੁਤਾਬਕ ਰਵਿੰਦਰ ਸਿੰਘੀ ਨੇ ਸ਼ਿਕਾਇਤ ਦਿੱਤੀ ਕਿ ਉਸ ਨੇ ਆਪਣੇ ਬੱਚਿਆਂ ਦੇ ਵਿਆਹ ਲਈ ਅੱਧਾ ਕਿਲੋ 24 ਕੈਰਟ ਸੋਨੇ ਦਾ ਬਿਸਕੁਟ ਖਰੀਦਿਆ ਸੀ, ਜਦਕਿ ਉਸ ਦੀ ਪਤਨੀ ਨੇ ਵੀ ਪੁਰਾਣੇ ਗਹਿਣੇ ਦੇ ਕੇ ਅੱਧਾ ਕਿਲੋ ਸੋਨਾ ਬਿਸਕੁਟ ਦੇ ਰੂਪ ਵਿੱਚ ਤਿਆਰ ਕਰਵਾਇਆ ਸੀ।
ਸ਼ਿਕਾਇਤਕਰਤਾ ਅਨੁਸਾਰ 2016 ਵਿੱਚ ਉਸ ਨੇ ਆਪਣੇ ਪਿਤਾ ਨਾਲ ਮਿਲ ਕੇ ਇੱਕ ਕਿਲੋ ਸੋਨਾ ਆਪਣੇ ਕਲੀਨਿਕ ਨਾਲ ਲੱਗਦੇ ਸਰਵਿਸ ਸਟੇਸ਼ਨ ਦੀ ਕੰਧ ਵਿੱਚ ਦੱਬ ਦਿੱਤਾ ਸੀ।
ਇਸ ਬਾਰੇ ਉਸ ਦੇ ਪਿਤਾ ਤੋਂ ਇਲਾਵਾ ਕਿਸੇ ਹੋਰ ਨੂੰ ਜਾਣਕਾਰੀ ਨਹੀਂ ਸੀ। ਰਵਿੰਦਰ ਸਿੰਘੀ ਨੇ ਪੁਲਿਸ ਨੂੰ ਦੱਸਿਆ ਕਿ ਬਾਅਦ ਵਿੱਚ ਉਹ ਪਰਿਵਾਰ ਸਮੇਤ ਪਟਿਆਲਾ ਰਹਿਣ ਲੱਗ ਪਿਆ। ਜਦੋਂ ਉਸ ਨੂੰ ਆਰਥਿਕ ਲੋੜ ਪਈ ਤਾਂ ਉਸ ਨੇ ਪਿਤਾ ਨੂੰ ਕੰਧ ਵਿੱਚੋਂ ਸੋਨਾ ਕੱਢਣ ਲਈ ਕਿਹਾ। ਕਰੀਬ ਡੇਢ ਮਹੀਨੇ ਤੱਕ ਟਾਲਮਟੋਲ ਕਰਨ ਤੋਂ ਬਾਅਦ ਜਦੋਂ ਦੋਵੇਂ ਸੋਨਾ ਕੱਢਣ ਗਏ ਤਾਂ ਉੱਥੇ ਸੋਨਾ ਮੌਜੂਦ ਨਹੀਂ ਸੀ।
ਸ਼ਿਕਾਇਤਕਰਤਾ ਨੇ ਆਪਣੇ ਪਿਤਾ ’ਤੇ ਸੋਨਾ ਚੋਰੀ ਕਰਨ ਦਾ ਸ਼ੱਕ ਜਤਾਇਆ। ਪੁਲਿਸ ਨੇ ਉਸ ਦੀ ਸ਼ਿਕਾਇਤ ਦੇ ਆਧਾਰ ’ਤੇ ਸ਼ਕਤੀ ਪ੍ਰਸ਼ਾਦ ਸਿੰਘੀ ਖ਼ਿਲਾਫ਼ ਕੇਸ ਦਰਜ ਕਰਕੇ ਗ੍ਰਿਫ਼ਤਾਰ ਕਰ ਲਿਆ ਹੈ। ਪੁਲਿਸ ਮੁਤਾਬਕ ਮਾਮਲੇ ਦੀ ਜਾਂਚ ਅਤੇ ਪੁੱਛਗਿੱਛ ਜਾਰੀ ਹੈ।
Father arrested for allegedly making one kilogram of gold disappear case registered on son s complaint
