CM ਮਾਨ ਨੇ ਵੰਡੇ 606 ਨਿਯੁਕਤੀ ਪੱਤਰ; ਬੋਲੇ - 'ਆਉਣ ਵਾਲੇ ਸਮੇਂ 'ਚ ਬੈਂਕ ਬੈਲੰਸ ਨਹੀਂ, ਸਗੋਂ ਪੜ੍ਹਾਈ ਤੈਅ ਕਰੇਗੀ ਕੌਣ ਹੈ ਅਮੀਰ'
Punjab
CM ਮਾਨ ਨੇ ਵੰਡੇ 606 ਨਿਯੁਕਤੀ ਪੱਤਰ; ਬੋਲੇ - 'ਆਉਣ ਵਾਲੇ ਸਮੇਂ 'ਚ ਬੈਂਕ ਬੈਲੰਸ ਨਹੀਂ, ਸਗੋਂ ਪੜ੍ਹਾਈ ਤੈਅ ਕਰੇਗੀ ਕੌਣ ਹੈ ਅਮੀਰ'
ਚੰਡੀਗੜ੍ਹ, 3 ਜਨਵਰੀ 2026: ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ (CM Bhagwant Mann) ਨੇ ਨਵੇਂ ਸਾਲ 2026 ਦੀ ਸ਼ੁਰੂਆਤ ਨੌਜਵਾਨਾਂ ਨੂੰ ਸਰਕਾਰੀ ਨੌਕਰੀਆਂ ਦੇ ਤੋਹਫ਼ੇ ਨਾਲ ਕੀਤੀ ਹੈ। ਅੱਜ ਚੰਡੀਗੜ੍ਹ ਵਿਖੇ ਹੋਏ 'ਮਿਸ਼ਨ ਰੁਜ਼ਗਾਰ' ਦੇ ਪਹਿਲੇ ਸਮਾਗਮ ਦੌਰਾਨ ਮੁੱਖ ਮੰਤਰੀ ਨੇ ਸਿੱਖਿਆ ਵਿਭਾਗ ਦੇ 606 ਨਵ-ਨਿਯੁਕਤ ਉਮੀਦਵਾਰਾਂ ਨੂੰ ਨਿਯੁਕਤੀ ਪੱਤਰ (Appointment Letters) ਵੰਡੇ। ਇਸ ਮੌਕੇ ਉਨ੍ਹਾਂ ਨੇ ਇੱਕ ਵੱਡਾ ਅੰਕੜਾ ਜਾਰੀ ਕਰਦਿਆਂ ਦੱਸਿਆ ਕਿ ਪੰਜਾਬ ਸਰਕਾਰ ਹੁਣ ਤੱਕ 61,281 ਨੌਜਵਾਨਾਂ ਨੂੰ ਸਰਕਾਰੀ ਨੌਕਰੀਆਂ ਦੇ ਚੁੱਕੀ ਹੈ।
"ਪੂਰਾ ਪੰਜਾਬ ਮੇਰਾ ਪਰਿਵਾਰ ਹੈ"
ਨੌਜਵਾਨਾਂ ਨੂੰ ਸੰਬੋਧਨ ਕਰਦਿਆਂ ਮੁੱਖ ਮੰਤਰੀ ਭਾਵੁਕ ਨਜ਼ਰ ਆਏ। ਉਨ੍ਹਾਂ ਕਿਹਾ, "ਮੇਰੇ ਲਈ ਪੂਰਾ ਪੰਜਾਬ ਹੀ ਮੇਰਾ ਪਰਿਵਾਰ ਹੈ। ਅੱਜ ਜਦੋਂ ਮੈਂ ਤੁਹਾਨੂੰ ਨਿਯੁਕਤੀ ਪੱਤਰ ਫੜਾ ਰਿਹਾ ਹਾਂ ਤਾਂ ਮੈਨੂੰ ਉਨੀ ਹੀ ਖੁਸ਼ੀ ਹੋ ਰਹੀ ਹੈ, ਜਿੰਨੀ ਤੁਹਾਡੇ ਮਾਪਿਆਂ ਨੂੰ ਹੋ ਰਹੀ ਹੈ। ਮੈਨੂੰ ਇੰਝ ਮਹਿਸੂਸ ਹੋ ਰਿਹਾ ਹੈ ਜਿਵੇਂ ਮੇਰੇ ਆਪਣੇ ਪਰਿਵਾਰ ਦੇ ਕਿਸੇ ਮੈਂਬਰ ਨੂੰ ਨੌਕਰੀ ਮਿਲੀ ਹੋਵੇ।"
ਅਮੀਰੀ ਦੀ ਨਵੀਂ ਪਰਿਭਾਸ਼ਾ
ਆਪਣੇ ਭਾਸ਼ਣ ਦੌਰਾਨ ਮੁੱਖ ਮੰਤਰੀ ਨੇ ਇੱਕ ਅਹਿਮ ਸੰਦੇਸ਼ ਦਿੱਤਾ। ਉਨ੍ਹਾਂ ਕਿਹਾ ਕਿ ਆਉਣ ਵਾਲੇ ਸਮੇਂ ਵਿੱਚ ਸਮਾਜ ਦੀ ਸੋਚ ਬਦਲੇਗੀ।: "ਆਉਣ ਵਾਲੇ ਦਿਨਾਂ ਵਿੱਚ ਅਮੀਰ ਉਸਨੂੰ ਨਹੀਂ ਮੰਨਿਆ ਜਾਵੇਗਾ ਜਿਸ ਦੇ ਬੈਂਕ ਖਾਤਿਆਂ ਵਿੱਚ ਪੈਸੇ ਹੋਣਗੇ ਜਾਂ ਜਿਸ ਕੋਲ ਵੱਡੀਆਂ ਕਾਰਾਂ ਹੋਣਗੀਆਂ। ਅਸਲ ਵਿੱਚ ਵੱਡਾ ਆਦਮੀ ਅਤੇ ਅਮੀਰ ਉਹ ਮੰਨਿਆ ਜਾਵੇਗਾ, ਜਿਸ ਕੋਲ ਉੱਚੀ ਪੜ੍ਹਾਈ ਅਤੇ ਗਿਆਨ ਹੋਵੇਗਾ।"
ਪਿਛਲੀਆਂ ਸਰਕਾਰਾਂ 'ਤੇ ਤਿੱਖੇ ਰਗੜੇ
ਇਸ ਮੌਕੇ ਭਗਵੰਤ ਮਾਨ ਨੇ ਵਿਰੋਧੀ ਧਿਰਾਂ ਅਤੇ ਪਿਛਲੀਆਂ ਸਰਕਾਰਾਂ 'ਤੇ ਨਿਸ਼ਾਨਾ ਸਾਧਣ ਦਾ ਮੌਕਾ ਵੀ ਨਹੀਂ ਛੱਡਿਆ। ਉਨ੍ਹਾਂ ਤੰਜ਼ ਕੱਸਦਿਆਂ ਕਿਹਾ, "ਜਿਨ੍ਹਾਂ ਲੋਕਾਂ ਕੋਲ ਪਹਿਲਾਂ ਦਸਤਖਤ ਕਰਨ ਦੀ ਤਾਕਤ ਸੀ (ਸਾਬਕਾ ਮੁੱਖ ਮੰਤਰੀ/ਮੰਤਰੀ), ਉਨ੍ਹਾਂ ਨੇ ਉਹ ਕਲਮ ਸਿਰਫ਼ ਆਪਣੇ ਭਾਈ-ਭਤੀਜਿਆਂ ਅਤੇ ਰਿਸ਼ਤੇਦਾਰਾਂ ਨੂੰ ਨੌਕਰੀਆਂ ਦੇਣ ਲਈ ਵਰਤੀ। ਉਸ ਸਮੇਂ ਆਮ ਘਰਾਂ ਦੇ ਕਾਬਿਲ ਨੌਜਵਾਨ ਸਿਰਫ਼ ਚਿੱਠੀਆਂ ਦਾ ਇੰਤਜ਼ਾਰ ਹੀ ਕਰਦੇ ਰਹਿ ਗਏ, ਪਰ ਹੁਣ ਯੋਗਤਾ ਦੇ ਆਧਾਰ 'ਤੇ ਹਰ ਵਰਗ ਨੂੰ ਨੌਕਰੀ ਮਿਲ ਰਹੀ ਹੈ।"
CM Mann Distributed 606 Appointment Letters Said In The Coming Times Not Bank Balance But Education Will Decide Who Is Rich
