ਬਜਟ ਤੋਂ ਪਹਿਲਾਂ ਸੀਐਮ ਮਾਨ ਤੇ ਹਰਪਾਲ ਚੀਮਾ ਦੀ ਅਹਿਮ ਬੈਠਕ; ਮੁੱਖ ਮੰਤਰੀ ਦਾ ਟਵੀਟ- "ਤਿਆਰ ਰਹੋ, ਜਲਦ ਮਿਲੇਗੀ ਖ਼ੁਸ਼ਖ਼ਬਰੀ"
Punjab
ਬਜਟ ਤੋਂ ਪਹਿਲਾਂ ਸੀਐਮ ਮਾਨ ਤੇ ਹਰਪਾਲ ਚੀਮਾ ਦੀ ਅਹਿਮ ਬੈਠਕ; ਮੁੱਖ ਮੰਤਰੀ ਦਾ ਟਵੀਟ- "ਤਿਆਰ ਰਹੋ, ਜਲਦ ਮਿਲੇਗੀ ਖ਼ੁਸ਼ਖ਼ਬਰੀ"
ਚੰਡੀਗੜ੍ਹ: ਪੰਜਾਬ ਵਿਧਾਨ ਸਭਾ ਵਿੱਚ ਅੱਜ ਪੇਸ਼ ਹੋਣ ਵਾਲੇ ਸਾਲਾਨਾ ਬਜਟ ਤੋਂ ਕੁਝ ਸਮਾਂ ਪਹਿਲਾਂ ਸਿਆਸੀ ਹਲਚਲ ਤੇਜ਼ ਹੋ ਗਈ ਹੈ। ਬਜਟ ਪੇਸ਼ ਕਰਨ ਲਈ ਸਦਨ ਵਿੱਚ ਜਾਣ ਤੋਂ ਪਹਿਲਾਂ ਵਿੱਤ ਮੰਤਰੀ ਹਰਪਾਲ ਸਿੰਘ ਚੀਮਾ ਨੇ ਮੁੱਖ ਮੰਤਰੀ ਭਗਵੰਤ ਮਾਨ ਨਾਲ ਉਨ੍ਹਾਂ ਦੀ ਰਿਹਾਇਸ਼ 'ਤੇ ਮੁਲਾਕਾਤ ਕੀਤੀ। ਇਸ ਬੈਠਕ ਦੌਰਾਨ ਬਜਟ ਦੇ ਅੰਤਿਮ ਰੂਪ ਅਤੇ ਅਹਿਮ ਐਲਾਨਾਂ 'ਤੇ ਚਰਚਾ ਕੀਤੀ ਗਈ।
ਮੁੱਖ ਮੰਤਰੀ ਨੇ ਵਧਾਈਆਂ ਉਮੀਦਾਂ
ਇਸ ਮੁਲਾਕਾਤ ਤੋਂ ਤੁਰੰਤ ਬਾਅਦ ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਸੋਸ਼ਲ ਮੀਡੀਆ (Twitter/X) ਰਾਹੀਂ ਪੰਜਾਬ ਵਾਸੀਆਂ ਨੂੰ ਇੱਕ ਖ਼ਾਸ ਸੰਦੇਸ਼ ਦਿੱਤਾ। ਸੀਐਮ ਮਾਨ ਨੇ ਲਿਖਿਆ, "ਤਿਆਰ ਰਹੋ, ਖ਼ੁਸ਼ਖ਼ਬਰੀ ਜਲਦ ਆ ਰਹੀ ਹੈ।" ਮੁੱਖ ਮੰਤਰੀ ਦੇ ਇਸ ਇੱਕ ਟਵੀਟ ਨੇ ਪੰਜਾਬੀਆਂ ਵਿੱਚ ਉਤਸੁਕਤਾ ਪੈਦਾ ਕਰ ਦਿੱਤੀ ਹੈ।
ਕੀ ਹੋ ਸਕਦੀ ਹੈ ਉਹ 'ਖ਼ੁਸ਼ਖ਼ਬਰੀ'?
ਸਿਆਸੀ ਮਾਹਿਰਾਂ ਦਾ ਮੰਨਣਾ ਹੈ ਕਿ ਮੁੱਖ ਮੰਤਰੀ ਦਾ ਇਸ਼ਾਰਾ ਔਰਤਾਂ ਲਈ 1000 ਰੁਪਏ ਮਹੀਨਾਵਾਰ ਭੱਤੇ ਦੀ ਗਾਰੰਟੀ ਜਾਂ ਨੌਜਵਾਨਾਂ ਲਈ ਵੱਡੀਆਂ ਨੌਕਰੀਆਂ ਦੇ ਐਲਾਨ ਵੱਲ ਹੋ ਸਕਦਾ ਹੈ। ਅੱਜ ਅੰਤਰਰਾਸ਼ਟਰੀ ਮਹਿਲਾ ਦਿਵਸ ਹੋਣ ਕਾਰਨ ਇਹ ਉਮੀਦ ਹੋਰ ਵੀ ਪੱਕੀ ਹੋ ਗਈ ਹੈ ਕਿ ਬਜਟ ਦੇ ਪਿਟਾਰੇ ਵਿੱਚੋਂ ਔਰਤਾਂ ਲਈ ਕੋਈ ਵੱਡਾ ਤੋਹਫ਼ਾ ਨਿਕਲ ਸਕਦਾ ਹੈ।
Important Meeting Between CM Mann And Harpal Cheema Before The Budget Chief Minister s Tweet Be Prepared Good News Will Come Soon
