ਰੋਜਰ ਬਿੰਨੀ BCCI ਦਾ ਨਵਾਂ ਪ੍ਰਧਾਨ ਨਿਯੁਕਤ, BCCI ਦੀ ਸਾਲਾਨਾ ਆਮ ਬੈਠਕ 'ਚ ਲਿਆ ਫੈਸਲਾ
LPTV / Chandigarh
ਵੈੱਬ ਡੈਸਕ: ਰੋਜਰ ਬਿੰਨੀ ਨੂੰ BCCI ਦਾ ਨਵਾਂ ਪ੍ਰਧਾਨ ਬਣਾਇਆ ਗਿਆ ਹੈ। ਬੀਸੀਸੀਆਈ ਦੀ ਸਾਲਾਨਾ ਆਮ ਮੀਟਿੰਗ ਵਿੱਚ ਇਹ ਫੈਸਲਾ ਲਿਆ ਗਿਆ ਹੈ। ਦੱਸ ਦੇਈਏ ਕਿ ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (ਬੀਸੀਸੀਆਈ) ਦੀ ਸਾਲਾਨਾ ਆਮ ਬੈਠਕ ਅੱਜ ਮੁੰਬਈ ਦੇ ਤਾਜ ਹੋਟਲ 'ਚ ਹੋਈ, ਜਿਸ 'ਚ ਬੀਸੀਸੀਆਈ ਦੇ ਸਕੱਤਰ ਜੈ ਸ਼ਾਹ, ਹੁਣ ਸਾਬਕਾ ਪ੍ਰਧਾਨ ਸੌਰਵ ਗਾਂਗੁਲੀ, ਉਪ ਪ੍ਰਧਾਨ ਰਾਜੀਵ ਸ਼ੁਕਲਾ, ਖਜ਼ਾਨਚੀ ਅਰੁਣ ਸਿੰਘ ਧੂਮਲ ਅਤੇ ਸਾਬਕਾ ਭਾਰਤੀ ਕ੍ਰਿਕਟਰ ਰੋਜਰ ਬਿੰਨੀ ਵੀ ਮੌਜੂਦ ਸਨ।
ਬਿੰਨੀ ਨੇ ਸਾਬਕਾ ਭਾਰਤੀ ਕਪਤਾਨ ਸੌਰਵ ਗਾਂਗੁਲੀ ਦੀ ਜਗ੍ਹਾ ਲਈ ਹੈ। 67 ਸਾਲਾ ਬਿੰਨੀ ਹੀ ਬੀਸੀਸੀਆਈ ਪ੍ਰਧਾਨ ਦੇ ਅਹੁਦੇ ਲਈ ਨਾਮਜ਼ਦਗੀ ਦਾਖ਼ਲ ਕਰਨ ਵਾਲੇ ਇਕਲੌਤੇ ਉਮੀਦਵਾਰ ਸਨ। ਅਹੁਦੇਦਾਰਾਂ ਦੇ ਅਗਲੇ ਗਰੁੱਪ ਦੀ ਚੋਣ ਸਿਰਫ਼ ਇੱਕ ਰਸਮੀ ਹੀ ਸੀ ਕਿਉਂਕਿ ਸਾਰਿਆਂ ਦੀ ਚੋਣ ਬਿਨਾਂ ਮੁਕਾਬਲਾ ਹੀ ਹੋਣੀ ਸੀ।
ਬਿੰਨੀ, ਆਪਣੇ ਸਭ ਤੋਂ ਤਾਜ਼ਾ ਕਾਰਜਕਾਲ ਵਿੱਚ, ਕਰਨਾਟਕ ਰਾਜ ਕ੍ਰਿਕਟ ਸੰਘ ਦੇ ਪ੍ਰਧਾਨ ਰਹਿ ਚੁੱਕੇ ਹਨ ਅਤੇ ਹੁਣ ਬੀਸੀਸੀਆਈ ਦੇ ਪ੍ਰਧਾਨ ਬਣਨ ਤੋਂ ਬਾਅਦ ਰਾਜ ਸੰਸਥਾ ਤੋਂ ਅਸਤੀਫਾ ਦੇਣਗੇ। ਭਾਰਤ ਦੇ ਸਾਬਕਾ ਮੀਡੀਅਮ ਤੇਜ਼ ਗੇਂਦਬਾਜ਼ ਨੇ 1983 ਵਿਸ਼ਵ ਕੱਪ ਵਿੱਚ ਭਾਰਤ ਦੀ ਇਤਿਹਾਸਕ ਜਿੱਤ ਵਿੱਚ ਅਹਿਮ ਭੂਮਿਕਾ ਨਿਭਾਈ ਸੀ। ਉਸ ਨੇ ਇਸ ਦੌਰਾਨ ਭਾਰਤ ਲਈ 8 ਮੈਚ ਖੇਡੇ ਅਤੇ ਇਸ ਦੌਰਾਨ ਉਹ ਕੁੱਲ 18 ਵਿਕਟਾਂ ਲੈਣ ਵਿੱਚ ਸਫਲ ਰਿਹਾ। ਰੋਜਰ ਉਸ ਇਤਿਹਾਸਕ ਟੂਰਨਾਮੈਂਟ ਵਿੱਚ ਸਭ ਤੋਂ ਵੱਧ ਵਿਕਟਾਂ ਲੈਣ ਵਾਲੇ ਗੇਂਦਬਾਜ਼ਾਂ ਵਿੱਚੋਂ ਇੱਕ ਸੀ।
Roger Binny appointed as the new president of BCCI was decided in the annual general meeting of BCCI
