Paris Olympics - ਭਾਰਤੀ ਨਿਸ਼ਾਨੇਬਾਜ਼ਾਂ ਦੀ ਖ਼ਰਾਬ ਸ਼ੁਰੂਆਤ, ਤਗਮੇ ਦਾ ਸੁਪਨਾ ਟੁੱਟਿਆ, 10 ਮੀਟਰ ਏਅਰ ਰਾਈਫਲ ਮਿਕਸਡ ਟੀਮ ਬਾਹਰ
Admin / Sports
ਸਪੋਰਟਸ ਡੈਸਕ : ਪੈਰਿਸ ਓਲੰਪਿਕ ਵਿਚ ਭਾਰਤੀ ਨਿਸ਼ਾਨੇਬਾਜ਼ਾਂ ਦੀ ਸ਼ੁਰੂਆਤ ਚੰਗੀ ਨਹੀਂ ਰਹੀ। ਭਾਰਤੀ ਨਿਸ਼ਾਨੇਬਾਜ਼ 10 ਮੀਟਰ ਏਅਰ ਰਾਈਫਲ ਮਿਕਸਡ ਟੀਮ ਕੁਆਲੀਫਾਈ ਤੋਂ ਹੀ ਬਾਹਰ ਹੋ ਗਏ ਅਤੇ ਤਮਗਾ ਦੌਰ ਵਿਚ ਜਗ੍ਹਾ ਨਹੀਂ ਬਣਾ ਸਕੇ। ਰਮਿਤਾ ਅਤੇ ਅਰਜੁਨ ਬਾਬੂਤਾ ਦੀ ਜੋੜੀ 628.7 ਦੇ ਕੁੱਲ ਸਕੋਰ ਨਾਲ ਛੇਵੇਂ ਸਥਾਨ 'ਤੇ ਰਹੀ, ਜਦਕਿ ਇਲਾਵੇਨਿਲ ਵਾਲਾਰੀਵਨ ਅਤੇ ਸੰਦੀਪ ਸਿੰਘ ਨੇ 626.3 ਦੇ ਸਕੋਰ ਨਾਲ 12ਵੇਂ ਸਥਾਨ 'ਤੇ ਆਪਣੀ ਮੁਹਿੰਮ ਦਾ ਅੰਤ ਕੀਤਾ।
ਰਮਿਤਾ ਅਤੇ ਅਰਜੁਨ ਤਿੰਨ ਸ਼ਾਟ ਬਾਕੀ ਰਹਿੰਦਿਆਂ ਪੰਜਵੇਂ ਸਥਾਨ 'ਤੇ ਸੀ ਅਤੇ ਤਮਗਾ ਦੌਰ ਲਈ ਕੁਆਲੀਫਾਈ ਕਰਨ ਦੇ ਨੇੜੇ ਸੀ, ਪਰ ਭਾਰਤੀ ਜੋੜੀ 1.0 ਅੰਕਾਂ ਨਾਲ ਪਿੱਛੇ ਹੋ ਗਈ। ਅਰਜੁਨ ਨੇ ਦੂਜੀ ਰੀਲੇਅ ਵਿਚ ਚੰਗੀ ਸ਼ੁਰੂਆਤ ਕਰਦੇ ਹੋਏ 10.5, 10.6, 10.5, 10.9 ਦਾ ਸਕੋਰ ਬਣਾਇਆ, ਜਦਕਿ ਰਮਿਤਾ ਨੇ ਦੂਜੀ ਸੀਰੀਜ਼ ਵਿਚ 10.2, 10.7, 10.3, 10.1 ਦਾ ਸਕੋਰ ਕੀਤਾ। ਉਨ੍ਹਾਂ ਦੀਆਂ ਕੋਸ਼ਿਸ਼ਾਂ ਸਦਕਾ ਇਹ ਜੋੜੀ ਸਿਖਰਲੇ ਅੱਠਾਂ ਵਿਚ ਬਣੀ ਰਹੀ। ਹਾਲਾਂਕਿ ਇਹ ਸਕੋਰ ਤਮਗੇ ਦੇ ਦੌਰ ਵਿਚ ਜਗ੍ਹਾ ਬਣਾਉਣ ਲਈ ਕਾਫੀ ਨਹੀਂ ਸੀ। ਮੈਡਲ ਰਾਊਂਡ ਤੱਕ ਪਹੁੰਚਣ ਲਈ ਚੋਟੀ ਦੇ ਚਾਰ 'ਚ ਜਗ੍ਹਾ ਬਣਾਉਣੀ ਜ਼ਰੂਰੀ ਸੀ। ਚੀਨ, ਕੋਰੀਆ ਅਤੇ ਕਜ਼ਾਕਿਸਤਾਨ ਦੀਆਂ ਟੀਮਾਂ ਕੁਆਲੀਫਿਕੇਸ਼ਨ ਰਾਊਂਡ ਵਿੱਚ ਪਹਿਲੇ ਤਿੰਨ ਸਥਾਨਾਂ ’ਤੇ ਰਹੀਆਂ।
Paris Olympics Bad Start For Indian Shooters 10m Air Rifle Mixed Team Out
