ਕੈਨੇਡਾ 'ਚ ਮਿਲਿਆ ਬੀਏ·2·86 ਕੋਵਿਡ ਵੇਰੀਐਂਟ ਦਾ ਪਹਿਲਾ ਮਾਮਲਾ, ਹੈਲਥ ਅਧਿਕਾਰੀਆਂ ਨੇ ਕੀਤੀ ਪੁਸ਼ਟੀ
LPTV / Chandigarh
ਵਿਦੇਸ਼ ਡੈਸਕ: ਕੈਨੇਡਾ 'ਚ ਬੀਏ·2·86 ਕੋਵਿਡ ਵੇਰੀਐਂਟ ਦਾ ਪਹਿਲਾ ਮਾਮਲਾ ਸਾਹਮਣੇ ਆਇਆ ਹੈ। ਬ੍ਰਿਟਸ਼ ਕੋਲੰਬੀਆ ਦੇ ਹੈਲਥ ਅਧਿਕਾਰੀਆਂ ਵੱਲੋਂ ਸਾਰਸ ਕੋਵ-2 ਦੇ ਬੀਏ·2·86 ਸਟਰੇਨ ਦੇ ਇੱਕ ਮਾਮਲੇ ਦੀ ਪੁਸ਼ਟੀ ਕੀਤੀ ਗਈ ਹੈ। ਕੋਵਿਡ-19 ਦੇ ਇਸ ਵੇਰੀਐਂਟ ਨੂੰ ਅਜੇ ਪਿੱਛੇ ਜਿਹੇ ਹੀ ਦਿ ਵਰਲਡ ਹੈਲਥ ਆਰਗੇਨਾਈਜ਼ੇਸ਼ਨ ਦੀ ਵੇਰੀਐਂਟਸ ਦੀ ਲਿਸਟ ਵਿੱਚ ਸ਼ਾਮਲ ਕੀਤਾ ਗਿਆ ਹੈ।ਟੋਰਾਂਟੋ ਸਥਿਤ ਇਨਫੈਕਸ਼ੀਅਸ ਡਜ਼ੀਜ਼ ਐਕਸਪਰਟ ਡਾ· ਇਸਾਕ ਬੋਗੋਚ ਅਨੁਸਾਰ ਹਾਲਾਂਕਿ ਯੂਰਪ, ਅਮਰੀਕਾ ਤੇ ਕੈਨੇਡਾ ਵਿੱਚ ਸੰਕ੍ਰਮਣ ਵਿੱਚ ਹੋ ਰਹੇ ਵਾਧੇ ਲਈ ਇਸ ਨੂੰ ਜ਼ਿੰਮੇਵਾਰ ਨਹੀਂ ਮੰਨਿਆ ਜਾ ਰਿਹਾ ਪਰ ਬੀਏ·2·86 ਵਿੱਚ ਕੁਝ ਮਿਊਟੇਸ਼ਨਜ਼ ਹੋਈਆਂ ਹਨ, ਜਿਸ ਕਾਰਨ ਸਾਰਿਆਂ ਦੇ ਕੰਨ ਖੜ੍ਹੇ ਹੋ ਗਏ ਹਨ। ਉਨ੍ਹਾਂ ਆਖਿਆ ਕਿ ਇਸ ਵਿੱਚ ਬੀਏ·2, ਜਿਸ ਨੂੰ ਅਸੀਂ ਓਮਾਇਕ੍ਰੌਨ ਯੁੱਗ ਵਿੱਚ ਵੇਖ ਚੁੱਕੇ ਹਾਂ, ਨਾਲ ਮੇਲ ਖਾਂਦੇ ਤੱਤ ਹਨ। ਇਸ ਵਿੱਚ ਕੁੱਝ ਤੱਤ ਡੈਲਟਾ ਮਿਊਟੇਸ਼ਨਜ਼ ਨਾਲ ਮੇਲ ਖਾਂਦੇ ਵੀ ਹਨ। ਬੋਗੋਚ ਨੇ ਆਖਿਆ ਕਿ ਇਹ ਵੇਰੀਐਂਟ ਅਜੇ ਹੁਣੇ ਹੀ ਸਾਹਮਣੇ ਆਇਆ ਹੈ ਤੇ ਇਸ ਲਈ ਹਾਲ ਦੀ ਘੜੀ ਇਹ ਆਖਣਾ ਜਲਦਬਾਜ਼ੀ ਹੋਵੇਗੀ ਕਿ ਕੈਨੇਡਾ ਵਿੱਚ ਕੋਵਿਡ-19 ਦੇ ਮਾਮਲਿਆਂ ਉੱਤੇ ਇਸ ਦਾ ਕਿਹੋ ਜਿਹਾ ਜਾਂ ਕਿੰਨਾਂ ਅਸਰ ਪਵੇਗਾ।
Health officials confirmed the first case of BA·2·86 Covid variant found in Canada
