ਲੁਧਿਆਣਾ ਦੇ ਨਾਮੀ ਡਾਕਟਰ ਖ਼ਿਲਾਫ਼ ਮਾਮਲਾ ਦਰਜ, ਐਂਬੂਲੈਂਸ ਨੂੰ ਜਬਰਨ ਰੋਕ ਕੇ ਮਰੀਜ਼ ਦੀ ਜਾਨ ਨੂੰ ਖ਼ਤਰੇ ਵਿੱਚ ਪਾਉਣ ਦਾ ਦੋਸ਼
LPTV News / Ludhiana
ਐਂਬੂਲੈਂਸ ਦੀ ਚਾਬੀ ਕੱਢ ਕੇ ਉਸ ਵਿੱਚ ਸਵਾਰ ਮਰੀਜ਼ ਦੀ ਜਾਨ ਨੂੰ ਖ਼ਤਰੇ ਵਿੱਚ ਪਾ ਦਿੱਤਾ
ਐਂਬੂਲੈਂਸ ਚਾਲਕ ਨਾਲ ਗਾਲ੍ਹੀ-ਗਲੋਚ ਅਤੇ ਹੱਥਾਪਾਈ ਕੀਤੀ
ਲੁਧਿਆਣਾ। ਡੀ.ਐੱਮ.ਸੀ. ਹਸਪਤਾਲ ਨੇੜੇ ਇੱਕ ਡਾਕਟਰ ਵੱਲੋਂ ਐਂਬੂਲੈਂਸ ਨੂੰ ਰੋਕ ਕੇ ਚਾਲਕ ਨਾਲ ਮਾਰ-ਪੀਟ ਕੀਤੀ ਗਈ। ਇਸ ਦੌਰਾਨ ਐਂਬੂਲੈਂਸ ਦੀ ਚਾਬੀ ਕੱਢ ਕੇ ਉਸ ਵਿੱਚ ਸਵਾਰ ਮਰੀਜ਼ ਦੀ ਜਾਨ ਨੂੰ ਖ਼ਤਰੇ ਵਿੱਚ ਪਾ ਦਿੱਤਾ। ਡਾਕਟਰ ਹੋਣ ਦੇ ਬਾਵਜੂਦ ਅਜਿਹੀ ਲਾਪਰਵਾਹੀ ਕਰਨ 'ਤੇ ਪੁਲਸ ਵੱਲੋਂ ਉਸ ਖ਼ਿਲਾਫ਼ ਕਾਰਵਾਈ ਕੀਤੀ ਗਈ ਹੈ। ਥਾਣਾ ਡਿਵੀਜ਼ਨ ਨੰਬਰ 8 ਦੀ ਪੁਲਸ ਨੇ ਅਰਸ਼ਦੀਪ ਸਿੰਘ ਵਾਸੀ ਪਿੰਡ ਉੜਾਂਗ, ਸ਼੍ਰੀ ਮੁਕਤਸਰ ਸਾਹਿਬ ਦੀ ਸ਼ਿਕਾਇਤ 'ਤੇ ਡਾ. ਹਰਮਨ ਸੋਬਤੀ ਖ਼ਿਲਾਫ਼ ਮਾਮਲਾ ਦਰਜ ਕੀਤਾ ਹੈ। ਪੁਲਸ ਮਾਮਲੇ ਦੀ ਜਾਂਚ ਕਰ ਰਹੀ ਹੈ।
ਸ਼ਿਕਾਇਤਕਰਤਾ ਅਰਸ਼ਦੀਪ ਸਿੰਘ ਨੇ ਪੁਲਸ ਨੂੰ ਦੱਸਿਆ ਕਿ ਉਹ 22 ਅਗਸਤ ਨੂੰ ਆਪਣੀ ਐਂਬੂਲੈਂਸ ਵਿੱਚ ਸਹਾਇਕ ਜਗਦੀਪ ਸਿੰਘ ਨਾਲ ਮਰੀਜ਼ ਮਾਇਆ ਦੇਵੀ ਨੂੰ ਘਰ ਛੱਡਣ ਜਾ ਰਿਹਾ ਸੀ। ਜਦੋਂ ਉਹ ਡੀ.ਐੱਮ.ਸੀ. ਹਸਪਤਾਲ ਜਾਣ ਵਾਲੇ ਕੱਟ ਕੋਲ ਪਹੁੰਚੇ, ਤਾਂ ਅੱਗੇ ਚੱਲ ਰਹੀ ਕੌਫੀ ਰੰਗ ਦੀ ਔਡੀ Q-7 ਕਾਰ ਦੇ ਚਾਲਕ ਡਾ. ਹਰਮਨ ਸੋਬਤੀ ਨੇ ਅਚਾਨਕ ਬ੍ਰੇਕ ਲਗਾ ਦਿੱਤੀ।
ਕਾਰ ਦੇ ਅਚਨਚੇਤ ਬ੍ਰੇਕ ਮਾਰਨ ਕਾਰਨ ਐਂਬੂਲੈਂਸ ਪਿੱਛਿਓਂ ਟਕਰਾ ਗਈ, ਹਾਲਾਂਕਿ ਕਿਸੇ ਵੀ ਵਾਹਨ ਦਾ ਨੁਕਸਾਨ ਨਹੀਂ ਹੋਇਆ। ਇਸ ਦੇ ਬਾਵਜੂਦ ਔਡੀ ਡ੍ਰਾਈਵਰ ਡਾ. ਹਰਮਨ ਸੋਬਤੀ ਨੇ ਗੁੱਸੇ ਵਿੱਚ ਆ ਕੇ ਐਂਬੂਲੈਂਸ ਚਾਲਕ ਨਾਲ ਗਾਲ੍ਹੀ-ਗਲੋਚ ਅਤੇ ਹੱਥਾਪਾਈ ਕੀਤੀ। ਉਸ ਨੇ ਐਂਬੂਲੈਂਸ ਦੀ ਚਾਬੀ ਕੱਢ ਲਈ। ਚਾਬੀ ਕੱਢਣ ਨਾਲ ਗੱਡੀ ਦਾ ਏ.ਸੀ. ਬੰਦ ਹੋ ਗਿਆ, ਜਿਸ ਕਾਰਨ ਅੰਦਰ ਮੌਜੂਦ ਮਰੀਜ਼ ਮਾਇਆ ਦੇਵੀ ਦੀ ਤਬੀਅਤ ਵਿਗੜਨ ਲੱਗੀ ਅਤੇ ਉਨ੍ਹਾਂ ਨੂੰ ਘਬਰਾਹਟ ਹੋਣ ਲੱਗੀ।
ਡਾਕਟਰ ਸੋਬਤੀ ਆਪ ਡਾਕਟਰ ਪੇਸ਼ੇ ਨਾਲ ਸਬੰਧਤ ਹਨ, ਫਿਰ ਵੀ ਉਨ੍ਹਾਂ ਨੇ ਮਰੀਜ਼ ਦੀ ਹਾਲਤ ਵੱਲ ਧਿਆਨ ਨਹੀਂ ਦਿੱਤਾ। ਫਿਰ ਆਸ-ਪਾਸ ਦੇ ਲੋਕਾਂ ਨੇ ਵਿਚਾਲੇ ਪੈ ਕੇ ਮਾਮਲਾ ਸ਼ਾਂਤ ਕਰਵਾਇਆ।
Case Registered Against A Prominent Ludhiana Doctor Accused Of Forcibly Stopping An Ambulance And Endangering A Patient s Life
